*Required
*Required
*Required
*Required
*Required
*Required
*Required
*Required
Send
Thank you for your application!
 

Pinngortitaleriffik qilalukkat qernertat tuugaavinik misissuinissaminut aningaasaliiffigilluarneqartoq

Pinngortitaleriffik 10 million kronenik aningaasaliiffigineqaqqammerpoq suleqateqarluni qilalukkat qernertat tuugaavinik ilisimatusarnermut atugassaminik. Nordforsk aningaasaliisuupput aningaasaliissutillu Århusimi Gøteborgimilu ilisimatusarfiit 2021imi aallartittussamik suleqatigalugit suliaqarnissamut atortorneqartussaapput. Pinngortitaleriffimmi professor Mads Peter Heide-Jørgensen ilisimatusartartorlu Eva Garde suliaminnut aningaasaliiffigineqarput, Nordforsk-illu sukumiilluinnartumik toqqagassaminnik misissueqqissaariarlutik aningaasaliiffigisassatut piukkunnartitaminnik aningaasaliiffigilluagassaminnillu toqqaasimapput.

Suliniummi qilalukkap qernertap tuugaava sannaavatigut, akuutissallu kemi atorlugit, tuugaallu ilusaa assigiinngitsorpassuartigut misissorneqartussaapput. Pinngortitaleriffiup misissugassaasa ilagaat tuugaap hormoninik akoqarnera qaleriiaanilu tunngaviusumik akui suunersut misissoqqissaartussaallugit. Tuugaaq ukiukkaartumik qallerneqartarpoq, soorlu orpik ukiut tamaasa qallerneqartarneratulli piffissallu ingerlasimasup iluani paasissutissarpassuarnik imaqalertarluni. Tuugaami qaleriiaarnerit paasissutissartaat atorlugit ilisimatusartartut qilalukkat qernertat uumanerminni oqaluttuassartaat, assersuutigalugu qilalugaq qernertaq qanoq utoqqaatigilertarnersoq, qaqugukkut kinguaassiorsinnaalertarnersoq, qaqugukkullu piaqqeqqaartarnersoq, uumanerminilu qaqugukkut suut nerisarneraat, qilalugaqatigiiaanullu sorlernut qilalugaq attuumassuteqarnersoq, suullu angalaarfigisarneraat tuugaava misissorluaannarlugu paasiniarneqarsinnaasussaapput. Ilisimatusartartut aamma misissussavaat, silap pissusiata allanngoriartornera ilutigalugu qernertat avatangiisaanni uumaniarnerannilu suut allannguuteqarsimanersut. Paasisat tamakkua qilalukkanut qernertanut tunngatillugu siunissami aqutsisut aalajangiisarnissaannut iluaqutaasartussaassapput. Tamakkua saniatigut Århusimi Gøteborgimilu ilisimatusarfinni misissorneqartussaavoq qanoq ilillutik qernertat tuugaavi qipisumik tallisarnersut, tuugaallu qipisuunerisa suut iluaqutissartarineraat aamma misissorniarneqarpoq.

Teknologi nutaaliaanerpaaq atorlugu hormonit, tunngaviusumik akui, isotopet tuugaallu kulstof 14 atorlugu misissuiffigineqarneri atorlugit tuugaap sannai piginnaasaalu misissorneqartussaapput. Taamaattumillu suliniummi ilisimatusarfiit arlallit suleqatigineqassapput, misissuinerni immikkut ilisimasalittaat atorluarneqassagamik.

Suliniut aqqutigalugu aamma suleqatigineqartussaapput EU-mi suliniuterujussuarmik ingerlatsisut silap allanngoriartornera pillugu videokut spil’li ineriartortinneqaleruttortumut tunngasoq.

 

Itisiliisumik paasisaqarniaraanni attavigineqarsinnaapput:

Professor Mads Peter Heidi-Jørgensen Mobil: +45 4025 7943
Email: mhj@ghsdk.dk, imaluunniit ilisimatusartartoq Eva Garde. Mobil: +45 6166 0460
Email: evga@ghsdk.dk

Qilalukkat tuugaavi, suliniummi atorneqartussat. Nunatsinni piniartut suleqatiginerisigut tuugaat katersorneqartarsimapput.