Tunumi qilalukkat qernertat ukiuunerani 2020-mi kisinneqalerput Saqqummersinneqarfia 12.02.2020
NAMMCO-p ilisimatuussutsikkut ataatsimiitsitaliaata innersuusutigaa Ittoqqortoormiut avataanni april-maajimi kisitsisoqassasoq. Kisitsiffiussaaq imaq sikuinneq ajortoq tamarmi aammalu qilalukkat qernertat ukiiffigisartagaat Ittoqqortoormiut Kangerlussuullu akornanniittoq. Kisitsinerlu aamma Liverpool Landimi Carlsberg Fjordimilu aamma ingerlanneqassaaq, sineriammiillu avammut 150 km tikillugit kisitsisoqassaaq, tassa 85.000 km2-itut isorartutigisoq kisitsiffiusussaavoq. (Takussutissaq 1)
Qilalukkat qernertat Ittoqqortoormiuni nalunaaqutserneqarsimasut ukiuunerani Ittoqqortoormiut kujataatungaaniittartut ilisimaneqareerpoq aatsaallu taakkua juni naaleraangat ilummukartarnissaat paasisat malillugit naatsorsuutigineqarpoq. Qilalukkallu qernertat nalunaaqutsersukkat Kangerlussuup kujataata kitaatungaaniittarpata, piniartullu naapertorlugit pisarineqartartut 20%-iisa missaat maj-juunimi Illoqqortoormiut avannaatungaani pisarineqartarmata. NAMMCO-miillu naatsorsuutigineqarmat taakkua upernaakkut pisarineqartartut aasakkut nunap eqqisssisimatitap avataaniittartuusinnaasut taamaasillutillu qilalugaqarfinniit allaneersuusinnaammata misissuiffigineqarnissaat NAMMCO-miit piumasaqaatigineqarnikuuvoq.
Kisitsinerup siunertaaraa:
– paasiniassallugu Ittoqqortoormiut avataanni immami sikuinneq ajortumi Illoqqortoormiullu avataanni qilalukkat qilalugaqarfinnit arlalinneersut ukiisarnersut
-paasiniassallugu tamaani qilalukkat qassiusarnersut
NAMMCO-p innersuussutaa Pinngortitaleriffiup piviusunngortinniarlugu pilersaarusiorfigileruttorpaa, aningaasaliiffigineqarnerlu naapertorlugu, 2020-mi apriilip naalernerani timmisartumiit kisitsisoqarnissaa pilersaarusiorlugu. Twin otterimik misissuinissamut akunnerni 50-ini timmisartumik misissuisoqassaaq, kisitseriaaseq NAMMCO-mit akuerineqarnikuusoq periuseralugu kisitsisoqassaaq, kisitsisuussappullu qilalukkanik kisitsinermut misilittagaqarluartut.
Taamaasinerani timmisartumik misissuissagaanni sikoqarnerata kingunerisaanik qilalukkut Ittoqqortoormiut kangerlussuannukarnissaat sikumit pinaveersimatinneqartussaavoq. (Takuuk takussutissaq 2 ukiuunerani nalinginnaasumik sikoqartarneranut tunngasoq) Qilalukkat tamarmik Ittoqqortoormiut avataanni imarmi sikuvinneq ajortumiinngikkunik Liverpoolip nunataata sineriaaniissimassammata. Kisitsinerni pingaaruteqarluinnarpoq qilalukkat qernertat ukiuunerani najortakkaminniitillugit kisinneqarnissaat. Qilalukkat qernertat ingerlaartillugit (junimiit juulimut imaluunniit novembarimiit decembarimut) kisissagaluaraanni pisariunerujussuullunilu periutsit akinerunerujussuit atorlugit ingerlanneqassagaluaramik.
Qilalukkat qernertat ukiuunerani najuuffigisaminniit aasakkut piniartarfinnukarnissaat naatsorsuutigineqanngilaq, ilimagineqarami qilalukkat qernertat ilaat nunap eqqissisimatitap tungaanut Ittoqqortoormiunut qanillinatilluunniit ingerlaarnissaat. Kisitsineq amerlanernik pisassiinernik kinguneqassasoq taamaattumik naatsorsuutiginngilarput. NAMMCO-lli uumasut timaasa sannaanik misissuinerit, satellitsikkut malinnaanerit, uumasut tigusiffiginerini misissukkat inerneri, pisaqartuniit paasisat allallu aallaavigalugit, paasissutissat nutaat pissarsiarineqartut atorlugit paasissutissat siunnersuinissaminnut atussagaat naatsorsuutigaarput.
Ittoqqortoormiut avataanni aatsaavissuaq ukiukkut misissuisoqartussaammat taamaattumik piniartut allallu soqutigisaqaqatigiit paasisaqarfigerusuppagut ilisimasaminnillu avitseqatigerusunneraatigut kisitsitinnatalu pilersaarusiornissatsinnut kisitsinerillu piviusunngortinnissaannut atorsinnaasatsinnik oqaasissaqarnersut paaserusoqaarput. Assersuutigalugu kisitsinissatsinnut tunngatillugu sumiiffinnut piffissamulluunniit pingaaruteqarsinnaasunut tunngasunik paasissutissiisoqarsinnaanera tikilluaqquarput.
Sapinngisamik 15. marts tikitsinnagu saaffiginnissuteqarnissarsi qilanaaraarput.
Pinngortitaleriffimmi kalaallisut qallunaatulluunniit saaffigisinnaaqaatsigut attaveqatigiinnermut pisortarput Else Løvstrøm aqqutigalugu, Elsep emaileraa: ellm@natur.gl. Oqarasuaatigalugu 361293, Facebookkimi aamma ”Piniartut Pinngortitaleriffillu” matoqqasumik qupperneqarput attaveqatigiiffigisinnaasaminnik.
Utimut nalunaaruteqarnissassinnut qilanaarluta
Miluumasunut Timmissanullu Immikkoortortaqarfik.
Takutitassaq 1. Sumiiffimmi tungujortumi ersersinneqarpoq sumi kisitsisoqassanersoq qanor-lu sikoqartiginersoq (2019-imi maaj-ip 3-anniit).
Takutitassaq 2. Sumiiffiup tungujortup takutippaa sumi kisitsisoqassanersoq nunallu killeqar-fiata naanera qanoq ilaatinneqartiginersoq. (Itissusaa meterikkaartumi agguataarneqarpoq).
Narhvaler/Qilalukkat qernertat. /Assiliisoq: F. Merkel
