Nunap sisoornera pisoqasaaq Nuup Kangerluani nassaarineqarpoq Saqqummersinneqarfia 28.01.2021
Ilisimatusartartut Pinngortitaleriffimmeersut suleqatigisartakkatik Irlandimeersut Polenimeersullu peqatigalugit ukiariaq Nuup Kangerluisa ilaanni nunap sisoorneranik pisoqasaarpasilaartumik siumuipput. Nunap sisoorneranik taama annertutigisumik ilisimatusartartut aatsaat takusaqarput, maani Kalaallit Nunaata kujasinnerumaartortaani. Sisoorneq 2 x 2 km missaanni annertussuseqarpoq, aammalu immap naqqanut allaat apuulluni aqqunni tamaat nunaminertanitsissimavaa. Ilisimatusartartut Nuup Kangerluini immap naqqinik misissuitillutik sisoorsimaneq naammattoorsimavaat. Kisiannili sisoornerup pinera qanganisaalaarsimagunarmat immami video´liuummik assilisat takutippaat ujaqqat sisoorsimasut immalli iluiniittut uumasunit naasuusanit naaffigineqareersimasut (assit pingajuat takuuk).
Nuna taamatut sisooraangami aalassannerujussuusarpoq, ujaqqat nakkaasorujussuusarlutik suna tamaat aqqutigiuminaallisillugu ilaatigut allaat tassaarsuartitsisarlutik. Taama nunap sisoortarneri ukiuni kingullerni qulini Chilemi, Alaskami nunatsinnilu pisimasut nalunaarsorneqarsimapput, tassanngaannaq sisoortoqarfiusinnaasutut ilisimaqquneqartut ilaattut taaneqarsimallutik. Nunatsinni sisoortoortarnerit nunap sananeqaatai apeqqutaallutik Nuussuup kitaatalu qiterpasissuata imartaanni pisinnaasutut nalunaarsorneqarsimapput.
“Eqqarsaatersuutigineqarsimavoq silap pissusiata allanngoriartornerata kingunerisaanik aammalu portusuunik sermersuaqarfittallit nunat sisoorfigitillattaarnerulernissaat ilimanaateqartoq. Taamatut nunap sisoortarnerinit inuit atortulersuutillu navianartorsiortinneqartarput. Taamaammat pingaaruteqartorujussuuvoq, silap kissatsikkiartuinnavinnera eqqarsaatigalugu, suli sisoortoortarnerit pisartussaanerat naatsorsuutigineqarsinnaammat sillimalluartoqarnissaa eqqumaffigeqqunaqaaq”, ilisimatusartartoq suleqataasoq M. Geertsema University of Northern British Columbiameersoq taama oqarpoq.
Kangerluit nalunaarsorneqarnerat
Ukiaq oktober 2020 – Pinngortitaleriffiup angallataa ‘Sanna’, umiarsuaaraq ilisimatusaat Nuup Kangerluani immap naqqa tamakkingajallugu nalunaarsuivoq, tamatumani anguniarneqarlutik immap assinginik tamakkiisunik pigisaqalernissaq, soorlu naqqi qanoq isikkoqarpat, qanoq ititigiva aammalu immap naqqa soqarpa – uumasoqarpa assigisaalu paasiniarneqarlutik aamma. Paasissutissat taama ittut pisariaqartinneqarput suut tamarmik ataqatigiiffii paasineruneqassappata aammalu anguniagaasimavoq immap naqqisa sanarfisaanerinik pissusaannullu paasiuminaassinnaasunut immap sikuanit ilusilersorneqarsinnaasartunit kangerluillu imartaanni uumassusillit ataqatigiiffiisa paasisaqarfiginerunnissaattaaq pingaaruteqarmata. Paasisaqarnerunikkut sikup – kangerluup – immallu ataqatigiiffii paasineqarnerussammata, taamaalilluni pisortat imaani pisuussutinik aqutsisut ingerlatsinerminni paasissutissanik ikorfartorluarneqarnerulissammata. Nuup Kangerlua tamakkingajallugu nalunaarsugaanera misissuinertigut anguneqarpoq, nunamik sisoorsimasumik nassaarneq allallu pissanganartut, soorlu Kapisillit saannguanni gasseqarfittut isikkoqarsinnaasut imaani takussutissat aamma nassaarineqarput.
Itinerusumik paasisaqarusunnermi saaffigisassaq:
Ilisimatusartartoq Diana W. Krawczyk, Silap Pissusianik Ilisimatusarfik, Pinngortitaleriffik, oqarasuaat: 361200 aamma email: dikr@natur.gl
Google Earth-imit nunap assinga, sisoorfiusimasut qaqortunik tikkuartorneqarput.
Immap naqqani uumassusillit ilaat (polymastia sponge) nunap sisoorsimasup ilaata immap naqqaniittup qaani naasimavorlusooq.
