Issittumi pisut issittumiiginnarneq ajorput Saqqummersinneqarfia 26.05.2021
”What happens in the Arctic, does not stay in the Arctic”, Issittumi pisut issittumiiginnarneq ajorput, silap allannguutai nunap killeqarfiinik ilisimasaqanngimmata, Sila Pissusianik Ilisimatusarfiup pisortaa Mie S. Winding Anthony Blinken-imut taamatut oqaritartuuteqarpoq.
Silap Pissusiata Ilisimatusarfiani pisortap, Mie S. Winding-ip amerikamiut nunanut allanut ministeriat Anthony Blinken Kangerlussuarmi naapippaa Nunatsinnilu silap allanngoriartornera pillugu saqqummiussiffigalugu.
Silap allanngoriartornera nunarsuattalu kissatsikkiartornera nunarsuarmi tamarmi sammineqartorujussuupput. Issittoqarfiillu silap allanngoriartorneranik ingammik sunnerneqarput, nunarsuup sinneranut sanilliussissagaanni issittup kissakkiartornera nunarsuup sinneraniit pingasoriaammik sukkanerugami.
USA-llu nunanut allanut ministeriata Anthony Blinken-ip tamanna uppernarsillugu takuaa, Pinngortitaleriffimmi, Silap Pissusianik Ilisimatusarfiup pisortaa Mie Winding Black Ridge-mi Kangerlussuarmiittumi naapikkamiuk. Tassa Nunanut allanut ministeri Anthony Blinken pisortatigoortumik tikeraarnermini Kalaallit Nunaannut aqqusaarnerminut atatillugu Kangerluarmiimmat.
– USA-p nunanut allanut ministeriat assut eqqummaarittutut qanilaartutullu misigaara, assut piareersarluarsimaarpasippoq apeqqutinillu pitsaalluinnartunik saqqummiussisarluni, Mie S. Winding-ip naapereernerata kingorna taama oqarpoq.
Nunatsinni Naalakkersuisut siulittaasuat Múte Bourup Egede, nunatsinnilu Nunanut allanut Naalakkersuisoq Pele Broberg aammalu qallunaat nunaanni nunanut allanut ministeri Jeppe Kofod ingiaqataasut ilagalugit. Mie S. Winding Issittumi silap allanngoriartornera pilugu saqqummiussaqarpoq, silallu allannguutaasa nunatsinni uumassusillit ataqatigiiffiinut inuiaqatigiinnullu qanoq sunniuteqarnersut pillugit oqaluttuarami. Isikkivigissorsuarlu isiginnaajutigalugu eqqartorpaat silap allanngoriartornerata Kalaallit Nunaat Issittorlu tamakkerlugu qanoq sunnerneqarnersut, aammalu peqatigiilluta qanoq iliuuseqarsinnaanersugut.
– Silap allanngoriartornera nunat killeqarfiinik ilisimasaqanngilaq, taamaattumillu issittumi allannguutit issittumiinnaq pineq ajorput, Mie S. Winding erseqqissaavoq.
Silap ataqatigiinneranut Kalaallit Nunaat pingaaruteqartorujussuuvoq. Tassami sermersuarujussuup nunatta 80%-ia qallersimammagu. Imeq serminnguussimasoq millionilikkaanik kubikmeterinik annertussusilik nunarsuatsinni imeqarfiusut 10 %-eraat. Silalu kissakkiartortillugu, Nunatta Sermersuaa, sermersuullu sinnaata isuliffii ilorparaluttuinnartarput, sermersuarlu tamarmi aassagaluarpat nunarsuarmi imaq 7,3 meterinik qaffattussaavoq.
Pinngortitaleriffik Nunatsinnilu Silap Pissusianik Ilisimatusarfik oqaluttuarisaanermi qangaaniilli ilisimatusartartunik danskinik amerikamiunillu suleqateqartuartarsimapput.
Nunanut allanut Naalakkersuisoq Pele Broberg, USA-p nunanut allanut ministeria Antony Blinken, Silap Pissusianik Ilisimatusarfiup pisortaa Mie S. Winding, Naalakkersuisut Siulittaasuat Múte Bourup Egede, Nasiffimmi Black Ridge/Tacan-imi sisamanngorneq 20. maj 2021. (Assiliisoq: Ólafur Steinar Rye Gestsson/Ritzau Scanpix)
Mie S. Winding-ip USA-mi nunanut allanut ministeri Anthony Blinken silap allanngoriartornera pillugu nassuiaakkaa.
Jeppe Kofod, Múte Bourup Egede, Mie S. Winding, Anthony Blinken kiisalu Pele Broberg.
