Kalaallit Nunaata kitaata imartaani 2022-mi saattuartassiissutigineqarsinnaasut amerlanerulaarsinnaapput Saqqummersinneqarfia 08.12.2021

Pinngortitaleriffimmiit saattuat pillugit siunnersuinerit Sisimiut eqqaanni saattuaqassutsinik misissuisarnernit tunngaveqarput aammalu saattuarniartartut aqutsiveqarfinni tamaniittut namminneerlutik nalunaarsuutaanneersuneersunik tunngaveqarlutittaaq. Aqutsiveqarfinni tamani biologinit siunnersuiviusuni 2021-mi pisassiissutigineqarsinnaasutut innersuussutigineqarsimasunit amerlanerulaartunik aappaagumut pisassiissuteqartoqarsinnaasoq innersuussutaapput.

Qeqertarsuup Tunuani saattuarniartartut nalunaarsuutaasa takutippaat taavani saattuaqassuseq qaffaallassimasoq, innersuussutigineqarporlu saattuartassiissutigineqarsinnaasut ilaneqarsinnaasut qaffallugit 796 tonsit sinnernagit pisassiissutigineqarsinnaasut.

Sisimiut eqqaanni sinerissap qanittuani saattuartarineqartartut ukiuni kingulliunerusuni appasissumiissimapput, illuatungaanilu biologit saattuaqassutsimik misissuisarnerisa takutippaat peqassuseq siuariaallassimasoq. Biologit siunnersuinerminni innersuussutigaat 2022-mi saattuartassiissutigineqarsinnaasut 547 tonsit qaangertariaqanngikkaluaraat. Taamaalilluni siorna pisassiissutigineqarsimasunit pisassiissutigineqarsinnaasut qaffariaateqalaarput, siornami pisassiissutigineqarmata 483 tonsit.

Sisimiut avataanni saattuartarineqartartut ukiuni kingullerni appasissumiissimapput, kisiannili biologit saattuaqassutsimik misissuisarnerisa kingulliit takutippaat saattuaqassuseq siuariaallassimasoq. Taamaalilluni 2022-mi 102 tonsit sippornagit saattuartassiisuteqartoqarsinnaasut. Siorna ukioq mannamut pisassiissutigineqarput 68 tonsit.

Aqutsiveqarfik Nuuk-Paamiut-ni sinerissap qanittuini saattuaqassuseq aalaakkaasumik inissisimavoq, uffa avataani saattuaqassuseq amerleriaateqalaarsimasoq. Taamaammat sinerissap qanittuini 2022-mi pisassiissutigineqarsinnaasut 1020 tonsit sipportariaqanngikkaluaraat innersuussutigineqarpoq. Avataani saattuartassiissutigineqarsinnaasut 302 tonsit sipportariaqanngikkaat innersuussutaavoq. 2021-mut pisassiissutigineqarsinnaasutut innersuussutigineqartut 806 tonsit aamma 214 tonsiusimapput.

Pinngortitaleriffimmiit innersuussutigaarput saattuarniartarnerit aalajangersimasumik inissinneqartariaqartut, tassa sinerissap qanittuini avataanilu saattuarniartartut tamarmik qaammatini martsimiit juuli ilangullugu saattuarniarsinnaatitaassasut. Taama aaqqiisoqarpat saattuanik nutaanik aalisarneqarsinnaalersussanik saattuaqassutsip pilersorneqarnera qulakkeerunneqarnerussagaluarpoq aammalu saattuanik aqippallaanik qalerualinnik avammut eqqaaginnartarneq, taamaalillunilu iginneqartut amerlanerpaartaat toquinnartarmata asuliinnartitsisarnerit ingalassimaarneqassagaluarmata.

Sukumiinerusumik paasisaqarusunnermi saaffigisassaq:

Siunnersortaallunilu ilisimatusartartoq AnnDorte Burmeister, email anbu@natur.gl imaluunniit oqarasuaat: 361200.

Ilanngussaq

Saattuaniartarnernut (Chionoecetes opilio) tunngatillugu siunnersuisarnerit ukiut tamaasa pisarput. Saattuaqassuseq ukiut tamaasa misissuiffigineqarluni nalilliiffigineqartarpoq, siunnersuinerlu pissutsinut piviusunut nalimmassarneqartarluni, tassa pissutsit nutaat allannguuteqartitsisimasupilussuuppata siunnersuineq naleqqussarneqartarpoq. Takussutissiaq 1-imi takuneqarsinnaapput 2022-mut saattuartassiissutigineqarsinnaasutut siunnersuinerit tonsinngorlugit.

Sinerissap qanittuani avataanilu saattuarniartarfiit Aqutsinermi pilersaarusiaq naapertorlugu immami 3 sømil killeqarfik killeraat.

Pinngortitaleriffik taamaallaat aqutsiveqarfimmi Sisimiuni, sinerissap qanittuani avataanilu saattuaqassutsinik misissuisarpoq. Aqutsiveqarfiit allat taamaallaat saattuarniartartut namminneerlutik nalunaarsuutaanniit paasisaqarfigineqartarput. Upernaviup eqqaani sinerissamut qanittumi saattuarniartarfiit. Maniitsup eqqaani sinerissap qanittuini saattuarniartarfiit kiisalu Narsap eqqaaniit Nunap Isua tikillugu saattuarniartarfiit biologinit nalilersuiffigineqarneq ajorput, taamatullu siunnersuivigineqartaratik.

Takuss. 1. Saattuarniarneq – siunnersuineq, pisat aamma pisassiissutit 2021-2022 (tons); ”-” = siunnersuisoqanng.