*Required
*Required
*Required
*Required
*Required
*Required
*Required
*Required
Send
Thank you for your application!
 

Misissuinerit paasinarsisippaa: Appat piaraanerusut ilungersunartorsiortut

Ilisimatusartartut paasiartulerpaat appat atlantikup avannaani, Kalaallit Nunaannilu sooq taamak ikiliartortiginersut. Misissuinerummi paasinarsisippaa appat suli kinguaassiorsinnaanngitsut ajornartorsiortitaanerusut, tassa piaqqiorfimmiit aniguereeraluarlutik nammineq piaqqiornissartik angunngitsoortarpaat. Ilisimatusartartut Canadameersut, Kalaallit Nunaanneersut/Danmarkimeersut, Islandimeersut Norgemeersullu suleqatigiissutigalugu misissuineq ingerlassimavaat. Misissuinerullu inernera ilisimatuussutsikkut saqqummersitsisarfimmi Marine Ecology Progress Series-imi saqqummersinneqaqqammerpoq.

Immami timmissanik ilisimatusartartut ilisimasatik tamaviisa kattussuullugit katersorsimavaat, peqassutsimullu takussutissiaralugit. Tassani timmissat ukiumiit ukiumut qanoq aniguillutik uumaannartarnersut pillugit paasissutissat, timissallu qassit iluatsittumik piaqqisarnersut, paasissutissallu allat nalunaarsorsimavaat. Periuserlu atorneqartoq malillugu ikiliartornerannut suna patsisaanersoq paasinarsisimavoq.

Paasinarsimmammi appat piaqqiortarnerat ajoqutissartaqanngitsoq, piaqqallu uumaannarsinnaanerat ingammik Kalaallit Nunaanni Islandimilu pitsaalluinnartuusoq. Piaqqiornerisa nalaanni nerisassaqarluarpoq appanut piaqqiortunut piaraannullu. Tamatumali kingorna piarai suli piaqqiorsinnaanngoratik toqusarput, (ukiut tallimat missaannik utoqqaatigileraangamik piaqqiorsinnaanngortaramik) allanilluunniit peqquteqarlutik piaqqiulinngitsoortarput. Appat suli piaqqiorsinnaanngitsut ukiisarfiat, silap pissusiata allanngoriartornerata kingunerisaanik nerisassaqarpiarunnaarsimasinnaavoq. Appat piaqqiorsinnaalereersut sunnerneqarpiarneq ajoraluarput, immaqa ittannerunertik allamiluunniit ukiisarsimanertik pissutigisimasinnaavaat, soorlu suli piaqqiorsinnaanngitsut najortagaat allamiissimasinnaagami. Appat suli piaqqiorsinnaanngitsut aamma piaqqiortartuninngarnik pisariuminarnerusinnaapput misilittagakinnerugamik.

 

Itinerusumik paasisaqarniaraanni attavissat: Flemming Merkel, flme@natur.gl imal. Morten Frederiksen, mfr@bios.au.dk