Naasoq allanartoq kujataani siumorneqartoq Saqqummersinneqarfia 17.08.2021

Naasoq Blågrå kalmia USA-mi Canadamilu nalinginnaasuusoq, ukioq manna juulimi siullermeerutaasumik nunatsinni naammattoorneqarpoq.

Tasiusaq Kujallermi juulip aallartinnerata ulluisa ilaanni Katja Frederiksen uinilu aalajangerput unnuaanerani pisuttualaarniarlutik. Ilisimanngilaalli siornatigut Kalaallit Nunaanni takuneqarsimanngitsumik siumuuinialerlutik.

– Tallimanngorneq juulip aappaanni silagippallaaqimmat uigalu nunamut pisuttuarujoorpugut. Qulisimakujulluni siallilaartarlunilu anoraa assut kissalaarpoq. Sunaaffa naasuaqqamik siumuissallunga!, Katja Frederiksen Tasiusami uinilu Malik Frederiksen savaatiliusoq allappoq.

Naasorlu siumugaat nalinginnaasuunngilaq. Nunatsinnimi siornatigut nalunaarsorneqarnikuunnginnami, naasorlu pineqartoq tassaavoq blågrå kalmia (kalmia polifalia). Nunatsinni ilisimaneqanngilaq, atuakkianilu Kalaallit Nunaanni naasunut tunngasuni, assersuutigalugu ”Nunatta Naasui”-mi, ”Grønlands Flora”-mi, imaluunniit ”Grønlands Vilde Planter”-imi aammalu nittartakkami nutaami Plants of Greenland, A Field Guide-mi ilanngunneqarnikuunngilaq.

Naasup naaffigisartagaa qaninnerpaaq Canadami Labradorimiippoq, Tasiusamiillu 1.100 km-inik ungasitsigisumiilluni.

– Naasut naaffigineq-ajugaanni naammattoorneqaraangata oqaatigiuminaattarpoq qanoq ilillutik tassunga pisimanersut. Naasut ilai timmissanit apuunneqartarput, ilaili inunnit apuunneqartarlutik. Inuit siunertarisaminnik siunertarinngisaminnilluunniit naasussanik siaruartereqataasarput, ilisimatusartartoq Pinngortitaleriffimmeersoq Ida B. Dyrholm Jacobsen taamak nassuiaavoq, Katja Frederiksenilli ilimaginngiivippaa naasup inunnit apuunneqarsimanissaa.

– Sumiiffik nassaarfigisarput nalinginnaasumik inunnit orninneqarneq ajorpoq. Illuaraqanngilaq aqqusinerlu 200 meterimik ungasitsigaluni. Savarpassuaqarfiuvorli, Katja Frederiksen nassuiaavoq.

Arlaannik naatitsisimasinnaasumik ilisimasaqannginnerarpoq. Naasumillu takutitsiffigisaasa tamarmik naasoq sorliunersoq nalusimavaat siornatigullu takusimanagu, naasulivinniluunniit naatinneqartoq takusimanngilaat.

Katja Frederiksenip naasunik siumuereernermi kingorna naasut qanoq inneri takuniarlugit alakkaqqissimagaluarpai asiulereersimasuulli naammattoorlugit.

Naasoq pillugu:

Blågrå kalmia orpigaaraasaavoq aappaluartunik qaamasunik sikkerninittartoq amitsunillu pilutaqartoq. Aasaanerani sikkerneri masarlunni qaammarsaataasutut ittarput. Naasoq kusanartorujussuuvoq toqussutigineqaratarsinnaasumilli toqunartoqarluni, pilutai isseralu gråanotoksinimik taaneqartartumik toqunartumik kutsuttut ittumik isseqartaramik. Tigulaariffik