Pikialasorsuaq pillugu nalunaarusiaq nutaaq Saqqummersinneqarfia 09.12.2021
Pikialasorsuaq imaqarfiuvoq immikkuullarilluinnartoq Baffin Bugtip avannaa-tungaani Canadap Kalaallit Nunaatalu akornaniittoq. Sumiiffik tamanna uumasoqassutsimigut pisuujuvoq inuiannullu pingaaruteqaqaluni, Issittumiikkaluarlunilu sikuneq ajornini ilisarnaatigaa. Ammanertat tassaapput sikuiuitsuugaluartuni ukiut tamaasa imaqarfinngortartut annertuut. Pikialasorsuup ammalanertaa Issittup avannarlianeersunik uumasorpassuaqarpoq immallu miluumasuinit pingaarutilinnit ornigarneqartaqaluni.
Ilisimatusartartut Kalaallit Nunaanneersut, Danmarkimeersut Canadameersullu qanimut suleqatigiillutik ilisimasat kattullugit maannakkut nalunaarusiorsimalerput. Nalunaarusiarlu Canadamiut ilisimatuussutsikkut nalunaarusiaanni tulleriissillugit saqqummersinneqartussani ilanngunneqassaaq, ilisimasallu saqqummiunneqartut Pikialasorsuup atorneqarnissaanik eriagineqarnissaanillu oqallinnermi atorneqartussatut tunngavissiaavoq.
Pikialasorsuup silap pissusiata allanngoriartorneranit annertuumik sunnerneqarnissaa ilimagineqartoq, Nalunaarusiami sammineqartut pingaarnerit ilagaat, tamannalu aamma pissutaaqataalluni uumasoqatigiiaavisa ataqatigiinneri immikkuullarilluinnartut navianartorsiortinneqarnerannut tunngapput. Ammalanertap inuiaat piorsarsimassusaannut aningaasaqarneranullu pingaaruteqarluinnarnera nalunaarusiami naqissuserneqarpoq. Inuiaat Canadameersut Kalaallit Nunaanneersullu tamatumani pineqarput. Innersuutigineqarporlu Pikialasorsuarmi pinngortitaq uumasullu sukumiisumik malinnaavigineqaqqissaartariaqartut, siunissamilu silap pissusiata allanngorarneranik tunngaveqaqisumik tamanna tulluarsaaffigineqarsinnaaniassammat.
Nalunaarusiaq Canadami tuluttut saqqummersinneqassaaq, inuktitut, kalaallisut, franskisut danskisullu eqikkakkamik saqqummersinneqarumaarluni. Nalunaarusiaq Canadamiut (Department of Fisheries and Oceans) Kalaallit Nunaanneersut (Pinngortitaleriffik) Danmarkimeersullu (DCE, Aarhus Universitet) qanimut suleqatigiinnerannit pilersitaavoq.
Suliniummut nunatta qallunallu aningaasaliissutaat Danmarkimi Miljøministereqarfimmiit matuneqarput, aningaasallu Issittumi avatangiisinut tunngasutigut tapiissuteqarnissamut suliniuteqarfimmeersuupput.
Nalunaarusiaq naalisagaq uani atuarneqarsinnaavoq:
- Kalaallisut: Pikialasorsuup eqqaamiorisaanilu pinngortitami pissuseqatigiinnikkut nalinga, ilisimanngisat akornusersuutaasinnaasullu suussusersineri
- Danskisut: Identifikation af økologisk betydning, videnshuller og stressfaktorer for Nordvandet og tilstødende områder
- Tuluttut: Identification of Ecological Significance, Knowledge Gaps and Stressors for the North Water and Adjacent Areas
Nalunaarusiaq tamakkerlugu tuluttut allataasoq uani atuarneqarsinnaavoq: Pikialasorsuaq pillugu nalunaarusiaq
Pinngortitaleriffimmi attavissaq:
Immikkoortortami pisortaq Fernando Ugarte, Timmissanut Miluumasunullu Immikkoortortaqarfik, Oqaras.: +299 36 12 42 imal. e-mail: feug@natur.gl
