Pinngortitaleriffimmut aattuumassuteqartut Ph.d.-nngortut 23-ssaat ammassannut tunngavoq Saqqummersinneqarfia 24.09.2021

Uumassusileritooq Peter Fink-Jensen, Pinngortitaleriffimmi Aalisakkanut Qalerualinnullu Immikkoortortaqarfimmeersuullunilu DTU Aqua-meersoq, Ph.d.-tut naammassissutiminik qanoq ammassaqatigiiaat immikkooruteqartiginerannut tunngasumik, qulequtalimmik: ”Stock structure and connectivity of capelin (Mallotus villosus) in Greenland – Otolith microchemistry used to track past whereabouts of a small, pelagic fish” ullumi saqqummiivoq.

Peter Fink-Jensenip ph.d.-nngorniutimisut Kalaallit Nunaanni ammassaat sinerissap qanittuaneersut qanoq ammassaqatigiiaartiginerat angalariaasiallu misissuiffigisimavai. Ammassak issittup imartaani aalisakkat nassaassaanerpaat ilagaat, uumassusillillu ataqatigiiaarneranni pingaaruteqarluinnartuuvoq, aalisagarpassuarnit allanit, timmissanit miluumasuniillu nerisarineqarami.

Peter Fink-Jensenip misissuinermini paasinarsisippaa Kalaallit Nunaata sineriaani assigiinngitsunik immikkoortunillu ammassaqatigiiaaqartoq, ammassaallu uumanertik tamakkerlugu sumiiffimmi aalajangersimasumiittartut, soorlu kangerloqarfimmi aalajangersimasumi. Paasisallu atorlugit sinerissap qanittuani ammassanniarnermik ingerlatsisoqassappat paasisat pingaaruteqarluinnarput, ammassaallu aalisarneqarpallaarnissaat pinngitsoorneqassappat ammassaqatigiiaat kangerlunnut ataasiakkaanut attuumassuteqartutut ingerlatsivigineqartariaqassapput.

‘Ammassaqatigiiaat Kalaallit Nunaanni sinerissap qanittuaneersut nunaqartunit annertunngikkaluamik namminerlu pissatut aalisartuarneqarlutillu atorluarneqartuarsimapput. Maannakkut aalisakkanik tunisassiortut ammassannik annertunerusumik tunisassiortunngussallutik soqutiginnittut amerlanerulernikuupput, tunisassiariumaneqartullu pillugit ilisimasat killeqarmata Peter Fink-Jensenip suliai assut pingaaruteqarput. Suliaasa inerneri paasisanik nutaanik ammassannik tunisassiulernissamut atorneqarsinnaasunik imaqarput‘, Helle Siegstad, Aalisakkanut Qalerualinnullu Immikkoortortaqarfimmi pisortaq oqarpoq.

Peter Fink-Jensenip Ph.d.-mik ilinniarnera Royal Greenlandimit, Polar Seafoodimit, GrønlandsBANKENimit DTU-miillu aningaasaliiffigineqarpoq. Ataatsimeersuarnernullu peqataaneri Otto Mønsted Fond-imit aningaasaliiffigineqarlutik.

Peter Fink-Jensenip Ph.d.-liaa tamakkerlugu una attavigalugu piniarneqarsinnaavoq: stub@aqua.dtu.dk

Itinerusumik paasisaqarniaraanni attavissaavoq:

Peter Fink-Jensen oqa.: +45 25383990 imal. e-mail: pefi@aqua.dtu.dk