Qeqqussanik naatitsineq pillugu nalunaarusiat nutaat Saqqummersinneqarfia 03.03.2021

Qeqqussat nerisassiornermi, nerukkaatissaliornermi, akuisa ilaasa nerisassanut, amigissaatinullu atorneqarnissaannut pinngortitameersunilluunniit nukissiutiliornermi atorneqarnissaat soqutigineqaleraluttuinnarput. Nunarsuaq tamakkerlugu qeqqussanik tunisassiorneq ukiumut 5-6 %-inik annertuseriartarpoq. Naak qeqqussanik pinngortitami nammineq naasimasunik tunisassiorneq nunarsuarmi tamakkiisumik tunisassiarineqartartut 5 %-iinit annikinnerugaluartut, taamaattoq tunisassiarineqartartut million tonsit ukiumut angusarpai.

Qeqqussat Kalaallit Nunaanneersut atorluarneqanngilluinnarput. Qeqqussanik katersinissamik akuersissuteqarfigineqarsimasut ikittuinnaapput, nunaqavissullu qeqqussanik tunisassiulerusukkaluartut pappiararsornertaatigut allaffissornertaatigullu piumasaqaataasunut malinninniarnermikkut tusiapittarlutik.

Qeqqussanilli annertuumik naatitsissagaanni uumassuseqatigiiaanut kissaatiginanngitsumik tamanna kinguneqartitsisinnaavoq, naatitsissagaannili sorliit naatinniarnerlugit toqqaasoqarsinnaavoq pitsaassusissaalu nammineq aqullugu, taamaattumik Aarhus Universitetimi, Pinngortitaleriffimmi Tarí – Faroe Seaweeds-imilu ilisimatusartartut Kalaallit Nunaanni qeqqussanik naatitsisoqarsinnaanersoq paasiniarlugu misissuisoqarnissaa piukkullutigu naliliisimapput.

Nalunaarusiami ”Forsøgsdyrkning af tang i Grønland – Gennemprøvning af metode”-mi nutaaliorfissaliorneq, nutaalialiorfik qeqqussallu pilutakkaat allunaasani kingunissaliortarnissaannut ineriartortitsinerit, qallunaat nunaanni savalimmiunilu atugassatut tulluarsakkat pillugit naatitsinermut najoqqutassat ilisimaneqarluartut aallaavigineqarput. Qallunaatut allassimavoq.

Nalunaarusiallu aappaani ”Sustainable Harvest of Seaweed in Greenland (SUSHi) Optimising harvest · Minimising impacts”-imi pineqartut tassaapput qeqqussanik naatitsisarnerup allaffissornertaata aaqqissuunneqarsinnaaneranik aammalu ilitsersuutinik pisariaqartitsinerit suunerinik misissuinerit, Kalaallit Nunaannilu qeqqussanik tunisassiornerup piujuartitsiniartumik aningaasarsiornikkullu illersorneqarsinnaasumik ingerlanneqarsinnaaneranik paasissutissiinerit. Tuluttut allassimavoq.

Nalunaarusiat uani atuakkit:

Forsøgsdyrkning af tang i Grønland – Gennemprøvning af metode

Sustainable Harvest of Seaweed in Greenland (SUSHi) Optimising harvest · Minimising impacts