Silap Pissusianik Ilisimatusarfik nutaamik pisortartaarpoq Saqqummersinneqarfia 26.04.2021
Pinngortitaleriffiup Mie Hylstofte Sichlau Winding Silap Pissusianik Ilisimatusarfimmi pisortatut atorfinitsippaa
Ilisimatusarfeqarfik pinngortitaq inuiaqatigiillu pillugit ilisimatusariaatsit akimorlugit suleriuseqartoq Pinngortitaleriffimmut atasuuvoq. Ilisimatusarfeqarfiup silap pissusiata allanngornerata issittumi imaani uumassusillit ataqatigiiffiinut sunniutaanik, taamalu kalaallinut inuiaqatigiinnut kingunerinik ilisimatuussutsikkut misissuisarfiuvoq. Sermersuup aakkiartupiloornera tamatumalu immap kissassusianut nillissusianullu taamalu imaani uumassusillit ataqatigiiffinut sunniutaat immikkut isiginiarneqarlutik malinnaaffigineqarput misissuiffigineqartarlutillu. Ilisimatusarfeqarfik Danmarkimi Ilinniartitaanernut Ilisimatusarnernullu Ministeeriaqarfimmit aningaasalersorneqarluni ingerlavoq.
Pisortartaaq Mie Winding Silap Pissusianik Ilisimatusarfimmi ukiuni tallimani atorfeqareerpoq, ukiullu kingulliit marluk pisortaagallartutut inissisimanikuulluni. Taassuma pisortanngortinneragut Ilisimatusarfeqarfik siuttoqalerpoq pikkorissumik siunnerfiliilluarsinnaasumillu, Issittumilu ilisimatusarnernik misilittagaqarluartumik. ”Ingerlaqqinnissannut qilanaartupilussuuvunga, pingaartumik maani nunami ilisimatusarnerit suli pitsaanerulersinnissaannut, akuersaarneqarnerunissaannut aammalu inuiaqatigiinnit kalaallinit atorneqarsinnaasunik, maanilu ingerlanneqartumik nukittorsaaqataaqqinnissakka nuannaarutigeqaakka”, Mie Winding oqarpoq.
Mie Winding Roskilde Universitetimi avatangiisinut biolog-itut ilinniarsimasuuvoq, imaanilu uumassusilerinermi Danmarks Tekniske Universitetimit ph.d.-qarluni. Siusinnerusukkut atorfigisimasai ilaatigut ukiut marluk Saudi Arabiami King Abdullah University of Science and Technology-mi sulisimavoq. Mie Winding aamma pinngortitaq pillugu ilisimatuussutsikkut paasisanik paasissutissiinernik misilittagaqarluartuuvoq ilaatigut ukiorpaalussuarni Københavnimi Experimentarium-imi sulisimalluni.
”Isumaqarluinnartarpunga ilisimatusartartup paasisaminik ilisimatusartartoqatiminuinnaanngitsoq inuiaqatigiinnulli aamma ingerlatitseqqittarneq suliassaasa pingaarnersarigaat. Silap Pissusianik Ilisimatusarfimmi inuuiaqatigiinnik peqataatitsiniarnerit isumassanillu immersueqataaniarnerit iluatsinniartarpagut suliavut ilisimatusarfeqarfittalu ilinniagaqarnermi sammisassaqartitsisarnera aqqutigalugit”, Mie Winding oqarpoq.
Silap Pissusianik Ilisimatusarfeqarfiup pingaarnerpaatut suliassaraa ilisimatuussutsikkut inernernik saqqummiussuiuarnissaq, taakkulu sapinngisamik imaani uumassusilinnit pisuussutitta silap pissusiata allanngorneranit kinguneqartumik inuiaqatigiit kalaallit qanoq sunnerneqarnerannik takussutissiisartussaapput. ”Immap allanngoriartornerata kinguneranik unammilligassat pingaarnerit suunerinik inuiaqatigiit apeqqusersuinerannut akissutissaqartuarnissaq sillimaffigissallugu suliassaraarput. Ilaatigut ilisimatusariaatsit assigiinngitsut akimorlugit suleriuseqarneq, soorlu pinngortitamik inuiaqatigiinnilu pisunik ilisimatusarnerit kattullugit aammalu sumiiffimmi nunaqavissut ilisimasaannik akullugit – taamaalillutalu tamakkiimanerusumik isiginninniarluta – aamma avatangiisit pitsaanerusumik inuillu pinngortitallu akornanni pisartut paasisaqarfigineruniarlugit suliagut ingerlattassavagut”, Mie Winding oqarpoq.
Pisortartaaq suliassaaleqinngiivittussaavoq. Tassami ilisimatusarfeqarfik piffissami kingullermi EU-mit Danmarkimiillu ilisimatusaatitut suliniutiginiakkanut arlalinnik aningaasaliissutinik tunineqarnikuuvoq, ilisimatusarfeqarfiup suliniutaanik sulisuinillu amerleriartitsisussanik.
Mie Winding atorfittaaminut sulilissaaq maajip aallaqqaataani 2021-mi, taarsissallugulu Malene Juul Simon, pisortatut atorfimminit nammineq kissaatigisaminik ilaquttamini napparsimasoqarnera peqqutigalugu tunuartoq. Malene Simon qaffasinnerusumik atorfeqarluni ilisimatusartartut ilisimatusarfeqarfimmi ingerlaqqissaaq, imaanilu miluumasunik ilisimatusaateqartarnini piffissaqarfiginerulissallugit qilanaareqai.
Itinerusumik paasisaqarusunnermi saaffigisassaq:
Pinngortitaleriffiup pisortaa Klaus Nygaard, oqarasuaat 361200 imal. email: nygaard@natur.gl
