Ukioq manna qaleralinnik misissuinerit Saqqummersinneqarfia 26.08.2021

Ilisimatuussutsikkut misissuissut SANNA atorlugu qaleraleqatigiiaanik ukiumoortumik misissuinerit naammasseqqammerput. SANNA-meersut Qeqertarsuup Tunuani, Uummannami Upernavimmilu qassusersorlutik aammalu Nuup eqqaani kilisaatersorlutik aalisagaqatigiiaat assigiinngitsut paasissutissartaannik katersereersimalerput.

Misissukkat ukioq mannarnisat inerneri siornarnisanut naleqqersuunneqarsinnaasussaammata, piffissap taamaalinerani sumiiffinni aalajangersimasuni misissuisoqartuaannarami. Angalanermi aalisakkat qaleruallillu sorliunerinik nalunaarsuisoqartarpoq, qaleralinnit, saarullinnit suluppaakkaniillu misissugassanik tigulaarinnittoqartarlunilu paasissutissanik nalunaarsuisoqartarpoq (aalisakkat sissii, DNA-vi, takissusii, oqimaassusii, suiaassusii, piaqqiorsinnaanngorsimaneri, kinguaassiutaasalu oqimaassusii, tinguisa oqimaassusii aalisakkallu salereernerinit oqimaassusii tamarmik nalunaarsorneqartaramik).

Aalisagaqarfiittaaq imartaasa itissutsini assigiinngitsuni kissassusii tarajoqassusiilu –immap qaavaniit kangerluit naqqi tikillugit – immikkut atortorissaarut (CTD) SANNA-miit aqqartittagaq atorlugu uuttortaavigineqartarput.

Angalareernerullu kingorna misissugassatut tigusarpassuit paasissutissallu katersat ikinngitsut misissoqqissaarneqartus-sanngorlutik nalilersorneqarlutillu suliassanngortarput. Angalanerni misissuinernit paasisat katersat aalisartoqarneraniillu nalunaarsukkat ilanngullugit (aalisartut logbogii tunisallu nalunaarsorneqarneri) siunnersuinernut ukiut marlukkaarlugit atuuttussanut atorneqartarput, siunnersuinerillu aappaagu juunimi 2022-mi nutarterneqartussaapput.