Miep Mette Ilisimasaqartilerpaa Saqqummersinneqarfia 21.03.2022
Mie S.Winding, Silap Pissusianik Ilisimatusarfimmi pisortaq, Ilulissanut qaaqqusaagami Nunatsinni silap pissusiata allanngoriartornera pillugu ilisimasaminik statsminister Mette Frederiksen-imut paasissutissiissuteqarpoq.
Naalakkersuisut siulittaasuat, Muté Borup Egede peqatigalugu, Mie S. Winding, silap allanngoriartornera, issittullu kissakkaluttuinnarneranut tunngasunik, aammalumi nunatsinni uumasoqatigiiaat ataqatigiiaarneri, inuiaqatigiinnullu sunniutaanik ilisimatitsiartornissaminut periarfissinneqarpoq.
-Iluliarsuit alutornarluinnartut, sikut puisillu avatangiiseralugit eqqartorpagut silap allanngoriartornerata Kalaallit Nunaat, Issittorlumi qanoq sunnerneraat, peqatigiillutalu qanoq iliuuseqarsinnaanerluta aamma eqqartorpagut, Mie S. Winding oqaluttuarpoq.
Eqqartorneqartorlu alla aamma pingaaruteqarluinnartoq tassaavoq Kalaallit Nunaat pillugu ilisimatusarnerit qanoq nunamut atassuteqalersissinnaanerigut, ukiunilu arlaqartuni nakkutilliissutissat ilisimatusarnermilu suliassat aningaasaliiffigineqarsinnaaneri.
– Silap allanngoriartorneranut Naalagaaffeqatigiit eqqartueqataaniarunik taava maannakkut pisut siunissamilu iliuuserineqarsinnaasut aqussinnaaniarlugit ilisimatusarneq, nakkutilliineq aammalu ilisimatusarnerup ingerlanneqarsinnaanerinut tunngasut aningaasaliiffigisariaqarluinnarpaat, Mie S. Winding oqarpoq.
Nunarsuatta silaanut Kalaallit Nunaat pingaaruteqartorujussuuvoq. Sermersuarujussuaq nunatta qeqqaniittoq nunallu 80%-ianik qalleeqqasoq tamatumani peqqutaalluinnarpoq. Imeq imerneqarsinnaasoq kubikmeterinik millionilikkaanik annertussuseqartoq serminngorsimasoq tamaaniippoq, taamaasilluni nunarsuatta imissamataasa 10%-ia tamaaniilluni. Silallu kissakkiartornera ilutigalugu nunatta sermersuaa aakkaluttuinnarpoq, sermillu isuliffiisa killeqarfii ilummooraluttuinnarlutik, sermersuarlu tamarmi aakkaluaruni nunarsuarmi imarpissuit 7,3 meterinik qaffattussaapput.
Mie S. Winding iluliarsuit saavini umiatsiami silap allanngoriartornera pillugu oqalugiartoq.
