Narsap Sermia nikeriaqqittoq Saqqummersinneqarfia 06.10.2022
Nuup Kangerlua piffissami kingullermi iluliarasaarlunilu sermialoqaqaaq – Nuuk allaat angullugu – aalisartunut sunngiffimminnilu angalasartunut assut akornutaasumik. Narsap Sermia, Nuup Kangerluata iluaniittoq taamaattoqarneranut patsisaavoq. Narsap Sermiata imaanut isuliffia piffissami kingullermi 400 m-inik ilanngarsimavoq (sermeq 320.000.000 tonsit missaannik annertussuseqartoq), sermerlu kaanngartoq taanna kangerlukkut Nuuk aqqusaarlugu anillattussaavoq.
Narsap Sermia aatsaat taamaalinngilaq, kingullermillu taamaattoqarnaviarnani. Narsap Sermia kingullermik ilanngarujussuarpoq 2011-mi, tassani imaani isuliffia 2 km-inik ilanngarmat. Narsap Sermiani taseq sermip iluaniittoq 2009-mi imaarpoq. Taamaattoqarneratalu kingunerisaanik imerujussuaq sermip imaani isuliffiata saavatigut kangerlummut aniavoq. Taamanikkut suluppaagarpassuit immap naqqani sermip eqqaaniittut ima sukkatigisumik immap qaavanut puttallartitaapput allaat toqussutigisaminnik. Taamani pisoq maanimiumik aavartumik assilineqarlunilu filmiliarineqarpoq.
Ass.: Jakob Berthels.
Ilulissat ullumikkut Ilulissani takuneqartartut angeqatai Nuup Kangerluani aamma siunissami takuneqartalertussaassapput.
Taamaattoqassappalli Narsap Sermiata isuliffia suli 4 km-inik ilorpartariaqassaaq, tassa itinersaq 1 km-inik itissusilik sermimik imallip nakkaaffigineqartalernissaata angunissaa apeqqutaaginnarami. Sermillu isuliffia tamaanga qaqugu killissanersoq oqaatigineqarsinnaanngilaq.
Narsap Sermia 2008-miilli Nunatsinni Silap Pissusianik Ilisimatusarfimmit misissugarineqalerpoq Nuup Kangerluata ilisimatusarfigineqarneranut ilanngullugu. Silap Pissusianik Ilisimatusarfiup kangerlummi immap qanoq innera – kissassusia, tarajoqassusia, qanorlu ingerlaarnera – tassa silap pissusiata allanngornera ilutigalugu qanoq tamakkua allanngorartigineri misissugarilerpai. Kangerluup uumassuseqarnera aammalu biokemi, qanoq akoorneqarnera, soorlu qanoq uumassutissaqartiginera ukioq kaajallallugu misissugarisarlugu.
Narsap Sermiata taamatut ilanngarneranut patsisaarpasilluinnarpoq septembarip naajartornerani siallersimanerujussua. Sermimilu tatsip imaarsimasinnaanera peqqutaaqataanersoq ilisimaneqanngikkallarpoq. Pisoqarneratami nalaani qulisimasimammat satellitsikkut assilisat iluaqutaavallaannginnamik. Sermip ilanngarnerata nalaani Narsap Sermiata eqqaaniittoqarsimassappat pissusissamisuunngitsumillu maluginnittoqarsimassappat tamanna annerusumik tusagaqarfigerusupparput (email aqqutigalugu: info@natur.gl)
Sukumiinerusumik paasisaqarniaraanni attavigineqarsinnaapput:
Silap Pissusianik Ilisimatusarfimmi ilisimatusartartoq John Mortensen e-mail: jomo@natur.gl imal. oqarasuaat +299 361200
