Pinngortitaleriffimmi ph.d.-nngortoq Saqqummersinneqarfia 26.08.2022
Manh Cuong Ngop apriilip aallaqqaataani 2022-mi imaani miluumasut qisuariartarnerannut nalunaarsueriaaseq suliarisimasani ph.d.-nngussutigaa, qulequtaqartoq: ”Modeling Marine Mammal Reactions” – imaani miluumasut periaasiannik qisuariartarnerannillu takussutissiisartoq. Ph.d.-nngorniutimini arferit pissusilersuutaat qisuariaataallu matematik atorlugu naatsorsuusiuleriaasiorluni suliarisimasani immikkoortunut pingasunngortillugit allaaserai.
Ph.d.-nngorniutaaneersut, qilalukkat qernertat immap iluani nipiliornernut Kalaalit Nunaatalu imartaata kissassusiata allanngoriartorneranut qisuariartarnerinut tunngasut, paasisaqarnerulernissamut atorneqarsinnaammata, Pinngortitaleriffiup misissuinermini periuuserilereerpai.
Manh Coung Ngo-p ph.d.-nngorniarluni allaaserisaani marlunni uuttortaatit qilalukkanut qernertanut sivikitsumik ikkusimatillutik paasissutissanik katersissutit atorlugit, qilalukkat qernertat akorngusersorneqanngikkaangamik imaanut aqqartarnerat nerisassarsiortarnerallu allaaserineqarput, aammalu annertussutsimik uuttortaatit (takissutsimik, silissutsimik itissutsimillu ersersitsisartut) atorlugit arferit qanoq itissusilimmut aqqarsinnaanerat, nipiliortarnerat ingerlaariaaseqarnerallu nalunaarsorneqartarsimapput.
Allaaserisami pingajuanni arfivinnik qaammataasanut nassitsissutit ukiuni 20-ni paasissutissanik katersorsimasaannik misissuilluni, qaammataassakkullu nassitsissutit immap kissassusianik uuttortaassutaasartut atorlugit Canadap Kalaallit Nunaatalu akornganni immap kissassusiata allanngoriartorneranut arfiviit qanoq qisuariaateqarneri misissorsimavai.
Manh Cuong Ngo-p misissuinermini matematik atorlugu naatsorsuusiornerit aamma ”machine learning” atorlugit, ph.d.-nngorniarnini Københavns Universitets Institut for Matematiske Fag-imi, ilisimatooq Susanne Ditlevsen siunnersuisoralugu ingerlassimavaa. Ilisimatoorlu Mads Peter Heide-Jørgensen Pinngortitaleriffimmeersoq avataaniit siunnersortaasimavoq, paasissutissallu misissuinermi atugassai aamma tunniussimallugit. Manh Cuong Ngo-p ph.d.-nngorniarnera Nunatsinni Ilisimatusarnermik Siunnersuisoqatigiit aningaasaliiffigaat.
Machine learning
”Machine learning” qarasaasiakkut atortorissaarutit atorlugit misissuinerit inernerisinnaasaannik kukkuneqannginnerusunik naatsorsuisinnaalersitsisarpoq. Paasissutissat qangaaniilli katersorneqarsimasut “ilikkarfigisani” aallaavigisarpai.
Manh Cuong Ngo-p ph.d.-nngussutaa uani atuarneqarsinnaavoq (tuluttut): Modelling Marine Mammal Reactions
