Qeqertarsuup Tunuani qalerallit Saqqummersinneqarfia 21.04.2022
Aalisartoqarnerani ukiup qanoq ilinera apeqqutaalluni angissutsit assigiinngittaqaat, taamaattumik ukiup aallartinnerani qalerallit angisuut nalinginnaanerusarput, aamma Qeqertarsuup Tunuani.
Ilulissat Kangiani ukiup aallartinnerata nalaani qalerallit anginerit pisarineqarnerusuaannarput. Qeqertarsuullu Tunuata sinnerani ukiuunerani aamma qassusersorluni qaleralinniartoqartarpoq (qassutit qaleralinnik aalajangersimasunik angissusilinnik pisaqakkajunnerusarput). Taamaattumik januaarimi februaarimilu pisarineqarsimasuniinnaq (qaammatini marluinnarneersuniinnaq) paasissutissat atorlugit ukiup siuliini ukioq naallugu pisarineqarsimasunut naleqqersuussisoqarsinnaaneq ajorpoq. Ukiummi siuliani pisat aasaanerani pisanik mikinerusartunillu ilaqartaramik. Kisitsisit 2022-meersut atorneqassagunik taava kisitsisinik januaarimi februaarimilu pisarineqarsimasunuinnaq, assersuunneqarsinnaapput, soorluttaaq ukiuni siuliini qaammatini taakkunani pisarineqarsimasut assersuunneqarsinnaasussaasut. Kisitsisit nalunaarsorneqarsimasut januaarimeersut februaarimeersullu nikerartorujussuusarput, tassani apeqqutaasarput Ilulissat Kangianni qanoq aalisartoqartigisarnersoq, Qeqertarsuullu Tunuani qanoq sikoqartiginersoq apeqqutaasarluni. Pinngortitaleriffiup qaleralinnik nunamut tulaatanik nalunaarsuinerini qalerallit sumi pisarineqarsimanersut ukiullu qanoq ilineraneersuuneri kiisalu aalisakkat ningittakkanik qassutinilluunniit pisarineqarsimanersut nalunaarsuutigisarpaat. Taamaasilluni ukioq kaajallallugu angissutsit agguataarneqarneri eqqortumik kisitsisilerneqarsinnaasarput.
Pinngortitaleriffik aamma Halibut Greenlandikkunnik allanillu qaleralinnik pisiortortartunik suleqatiginnilluareerput, pisarineqartartullu kisitsisaat annertunerugaluttuinnartumik Pinngortitaleriffimmut apuunneqartuaannarput. Tunisassiorfiit immikkoortiteriffiineersut kisitsisit Pinngortitaleriffiup pissarsiarisarpai. Taamaalilluni aalisakkat millionilikkaat ataasiakkaarlutik oqimaassusiat naatsorsorneqarsinnaasarpoq. Aalisakkalli tulaassat angissusiannik naatsorsuinerit, kisitsisit ilaannarivaat, kisitsisinummi tamakkiisunut taakkua ilanngunneqartaramik.
Kisitsisit nutaat 2021 aamma 2022-meersut kisitsisit appariarnerinut allannguinngillat, angissutsinut kisitsisit Qeqertarsuup Tunuaneersut ukiunilu kingullerni 10-15-ineersunut allannguingaanngillat. Oqaatigineqartariaqarporli Pinngortitaleriffiup nammineerluni ilisimatuussutsikkut umiarsuarminik Sanna-mik misissuinerisa takutimmassuk qaleraleeqqat aalisarneqarsinnaalersussat Qeqertarsuup Tunuani takkussuuttussaammata. Ingammillu qalerallit 2015-imeersut ukiunut siuliinut sanilliullugit amerlanerusut ukiuni tulliuttuni pisarineqarsinnaalertussaapput. Qalerallit taakkua 2015-meersut maannakkut 1 kg missaannik angissuseqarput, taamaattumik tunisassiorfiit qalerallit 2015-imeersut malugillualersimassagaat naatsorsuutigaarput.
Pinngortitaleriffimmi maannakkut paasissutissat sumiiffinni assigiinngitsuneersut qaleralinnut tunngasut katersuleruttorpagut. Siunnersuinerlu ukiunik marlunnik nutaanngissuseqartoq Qeqertarsuup Tunuanut, Uummannamut, Upernavimmullu tunngasoq juunip qiteqqunnerani siunnersuinermik nutaamik nutarterneqartussaareerpoq.
