Sinerissap qanittuini qaleralinniarnerit qaffaaffigineqarsinnaapput, avataanili appaaffigineqartariaqaraluarput Saqqummersinneqarfia 07.07.2022
Aqutsiveqarfinni Qeqertarsuup Tunuani Upernavimmilu qaleralittassiissutigineqarsinnaasut 20 %-imik qaffaaffigineqarsinnaanerat, avataanili qaleralinniarnernut pisassiissutigineqartartut appaaffigineqartariaqaraluartut biologinit innersuussutigineqarpoq.
Biologit NAFO-kkoorlugu siunnersuipput aqutsiveqarfinni Qeqertarsuup Tunuanut 2023-2024-mi qaleralittassiissutigineqarsinnaasut 5.215 tonsit, taamatullu aqutsiveqarfik Upernavimmi 6.070 tonsit sipportariaqanngikkaluaraat. Aqutsiveqarfinni taakkunani biologit namminneerlutik misissuinerannit paasissutissat ersersippaat, pineqartuni qaleraleqassuseq 20 %-imik qaffariaateqarsimasoq. Taamaattumillu NAFO-mit siunnersuineq taamaaqataanik qaffariaateqartoq erseqqissaatigineqarpoq. Aqutsiveqarfik Uummannami biologit misissuinerisa takutippaat, taavani qaleraleqassuseq allannguuteqarsimanngitsoq, taamaatumillu NAFO siunnersuivoq qaleralittassiissutigineqarsinnaasut allanguuteqarfiunatik ukiuni 2023-2024-milu ukiumut 5.153 tonsit sipporneqartarianngikkaluartut.
Aqutsiveqarfinni qaleralinniarfiusartuni pisaasartut tamakkerlugit 2021-mi imaapput: Qeqertarsuup Tunua 9.028 tonsit; Upernavik 8.480 tonsit kiisallu Uummannaq 9.609 tonsit.
Sinerissap qanittuini qaleralinniarfiusartuni uani siuliini taagorneqartuni biologit aalisartullu paasissutissaataasa takutippaat, qalerallit ukioqatigiikkuutaat ataatsit amerlasoorujussuullutik qaleraleqatigiiusut qaleralinniarfiusartunut pulammaatilernerat siunnersuinerni qaaffaassuteqartitsinernut tunuliaqutaasut. Tassa biologit ilimagaat qaleraleqatigiiaat (ass. ukiumi aalajangersimasumi suffiarineqartut) eqimattaallutik amerlasoorsuullutillu aalisarnermut pulammaakkiartuaartut ikinnerpaamik ukioqatigiiaat ataasiusimassasoq. Maanna suli ilisimaqqissaarneqanngilaq qaleraleqatigiiaat ukioqatigiittut qassit tamarmillu immikkoorlutik qanoq amerlatigisukkaarlutik takkutilernersut. Ataasiinnaalluunniillu amerlaarsuullutik takkunneragut qaleralinniartartut aalisartut misigisimatilissavai ukiuni aggersuni peqarluartussaarpasilersoq. Kisiannili ukioqatigiiaat amerlaarsuullutik takkuttut aatsaat arlaliuppata qaleralinniarneq sumiiffinni siuariarfiusuni aalaakkaasumik inissisimalissaaq. Biologit misissuisarnerisigut tamanna malinnaaffigeqqissaarneqassaaq.
Avataani qaleralinniartarnerit qiviarutsigit peqassutsip ukiuni makkunani killiffia qularnartorsiutigineqaqqajaalerpoq. Tamatumunnga peqqutaavoq avataani qaleraleqassuseq ukiuni arlaqalersuni biologinit misissuiffigineqarnikuunngimmat, NAFO-miillu misissuisoqartarsimannginnera toqqammaviliullugu mianersortussaatitaanermik aalajangiussaq atortinneqalerpoq. Taamaalilluni NAFO-mit innersuussutigineqarluni ukiuni 2023-mi 2024-milu ukiumut pisassiissutigineqarsinnaasut 29.640 tonsit sipportarianngikkaluaraat. Innersuussineq tamanna ukiut siuliini innersuussutaasartunit 6.730 tonsinik appariartitsivoq, kingullertigummi 36.370 tonsit pisassiissutigineqarsinnaasutut innersuussutigineqartarsimammata. NAFO-mit erseqqissaatigineqarpoq, aalisagaqassutsinik misissuisarnerit piaarnerpaamik aallarteqqinneqarnissaat pingaaruteqarnerpaajusoq, peqassutsimmi missiliorneqartarnerat paasissutissanik nutaanik toqqammaveqarluni nutarsartuarneqartussaammata.
Biologit ICES-ikkoorlugu siunnersuineranni saarulliit kitaata tamarmi Tunullu imartaanni aammalu Tunup imartaani qaralinnut tunngatillugu siunnersuinerit, taamaallaat suminaalunnguartigut allannguuteqarfiupput.
2023-mut aalisakkanut assigiinngitsunut siunnersuinerit
Aalisakkanut siunnersuinermut atuuttumut eqikkaaneq tamakkeqqasoq uani aaneqarsinnaavoq: NAFO-miit qalerallit pillugit 2023-mut siunnersuinerit eqikkarneqarnerat
Itinerusumik paasisaqarusunnermi saaffigisassaq:
Aalisakkanut Qalerualinnullu Immikkoortortaqarfimmi ilisimatusartartoq Rasmus Nygaard; oqarasuaat 361200 imal. Mail: rany@natur.gl
Malugiuk
