*Required
*Required
*Required
*Required
*Required
*Required
*Required
*Required
Send
Thank you for your application!
 

Uummannarmiut suleqatigalugit ilisimatuussutsikkut suliniutit nutaat Saqqummersinneqarfia 13.04.2022

Uummannap eqqaani najugaqarpit pinngortitamullu ilisimasatit ingerlateqqikkusullugit? Immap, sikup aalisakkallu avatangiisinniittut ernummatigaagit? Taamaappat aasamut ilisimatusartartut suleqatisererusuppaatsit.

Inuiaqatigiinni anguniakkat ilisimatusarnerlu pillugit ilisimatusartartut sumiiffinnilu najugaqavissut suleqatigiileraangata ilisimasarpassuit pingaarutillit katersorneqarsinnaanngortarput. Aasaru Uummannami ilisimatuussutsikkut suliniutit pingasut ingerlanneqassapput. Uummannarmiullu suleqatigalugit sikusarnera, immap kissassusia aalisagaqassusiallu pillugit misissuisoqassaaq.

Issittumi silap pissusiata allanngoriartornera Nunarsuup sinneranut sanilliullugu sisamariaammik sukkaneruvoq, Kalaallit Nunaat, innuttai inooriaasiallu annertuumik sunnerneqarsinnaallutik. Uummannallu avatangiisaanut najugaqartuinullu silap pissusiata allanngoriartornerata sunniutai paasisaqarfiginerorusullugit ilisimatusartartut innuttaasunut kaffisortitserusupput, apersuinernut, suliniaqatigiinnernut sikumi immamilu ingerlaaqatigiinnernut qaaqqusiumaarlutik.

Suliniut siulleq immap sikuanut tunngasoq aallartingajaliivippoq (sap.ak.16-17), tassani Parnuna E. Dahl, Bright Dale-miit aammalu Paninnguaq Korneliussen Uummannamiissapput. Ilisimatusartartut Uummannap eqqaata sikusarnera, sikup atorneqartarnera ukiullu ingerlanerini qanoq allanngoriartorsimaneranik oqaloqatiginnikkusupput. Suliniut USA-miit National Science Foundationimit aningaasaliiffigineqarpoq ilisimatusartartuniillu Brown University aamma Oregonip universitetianinngaanneersunit Nordland Research Institute-meersuniillu suleqatigiissutigineqarluni.

Suliniutip aappaani Uummannami aalisartut angalanerminni immap kissassusianik uuttortaassapput paasissutissallu katersatik toqqaannartumik pigilersinnaalissavaat. Suliniut Nunatsinni Ilisimatusarnermik Siunnersuisoqatigiinnit aningaasaliiffigineqartoq, Heidi Andreasen Uummannaq Polar Institute-meersoq Canadamilu University of Victoria-miit ph.d.-nngorniartoq Patrick Farnole aqutsisuutillugit 2020-p aasaanerani aallartippoq.

Suliniutit pingajuanni Silap Pissusianik Ilisimatusarfimmi ilisimatusartartup Caroline Bouchardip suleqataasalu uummannarmiut peqatigalugit eqalukkap Uummannap eqqaani inunnut uumasunullu pingaaruteqassusia, piffissallu ingerlanerani aalisakkamut tassunga allannguuteqartoqarsimanersoq misissuiffigissavaat. Suliniummut atatillugu juulip qaammataani aalisartut piniartullu oqaloqatigineqarnissaat pilersaarutigineqareerpoq. Suliniut Nunatsinni Ilisimatusarnermik Siunnersuisoqatigiinnit aningaasaliiffigineqarpoq.

 

Sukumiinerusumik paasisaqarniaraanni attavissaq:

Apeqqutissaqaruit ilisimatusartartumut Caroline Bouchard-imut, Silap Pissusianik Ilisimatusarfik, Pinngortitaleriffik saaffiginnissinnaavutit uunga: 36 12 00 E-mail: cabo@natur.gl