Piniartut ilisimatusartullu Qaanaami suleqatigiittut Saqqummersinneqarfia 08.05.2023

Ilisimatusartut Qaanaami piniartunik suleqateqarlutik immiussissutinik sikumiit ningitsisut.

Immap sikuani Qaanaamiit kujammut kimmut 26 km-isut ungasissusilimmi ilisimatusartut piniartullu imaani immiussissutinik uuttuutinillu piareersaapput, taakku kangerluup naqqanut ammut 212 meterimut ninginneqassapput. Tamaani imaani miluumasut nipaat aammalu sikup angallatillu tunuliaqutaasumik nipiliorneri immiutissavaat. Ujamiusatut atortut sikumi siassimapput pitoqqallutik qulaatigut ataatigullu puttaqusersorsimallutik, tassa immap iluani qummut siassimaniassammata. Pituutap naqqarpiaaniippoq kisaq 103 kg-sut oqimaassusilik, taassuma atortut naqqani aaliangersimassavai pituutarlu immap iluani qummoqqissaaq siaaqqatillugu.

Suleqatigiit tassaapput ilisimatusartuuneq Malene Simon Hegelund aamma sulianik ataqatigiissaarisoq Carl Isaksen Silap Pissusianik Ilisimatusarfimmeersut, immap pissusilerisoq Steffen M. Olsen Danmarks Metrologiske Institutimeersoq kiisalu piniartut Qillaq Danielsen, Gustav Simigaq aamma Quma Kvist.

Gustav Simigap Quma Kvistillu kisaq sikumi alluakkut 1,1 meterisut issussusilikkut ningippaat. Pituutaq uuttuutit pituuttaasut takitigisoq kisaq putullugu ingerlavoq. Illuatungaatigut sikumut kisaqqavoq, illualu qamutinut aaliangeqqalluni. Qamutit atorlugit ilisimatusartut uuttuutit kiviartornerat aqussinnaavaat.

Nalinginnaasumik uuttuutit imaannarmi angallammiit ninginneqartarput, Qaanaalli kangerlussua juni/juli tikillugu sikuusarmat, ilisimatusartut piniartunik siunnersorneqarlutik sikukkut uuttuutinik ningitseriaasitaarsimapput.

Ilisimatusartut aprilip naanerani, suli kangerluk sikuusoq, uuttuusersuiniarlutik aaliangersimapput, taamaalillutik aallaqqaataaniit sikuernerani immap miluumasui kangerlummut pulaneranni malinnaasinnaassallutik.

Ataasiakkaarlutik uuttuutit allussamut tarriortorput, qimusserlu qalliartorluni. Maanna puttaqutit qulliit immap qaaniipput, Malene Simon Hegelund-illu pituutaq, qamutinut aaliangernikoq kipivaa, kisarlu akornuteqarani immap naqqanut kiviartorsinnaanngorluni. Puttaqutit immap qaani uninngammersornerini, allussap eqqaa nipaaruppoq.

”Septemberimi takussaagut,” puttaqut kingulleq allussakkut morsummat Carl Isaksen oqarpoq. Ilisimatusartummi uuttuutit aasaq naallugu immiussereerpata septemberimi amuariartussavaat, taamanikkussamulli kangerluup sikunnginnerani angallammiissapput.

Ullut marluk qaangiummata qamutit pingasut kingumut uuttuutinik usilersorsimapput, ilisimatusartullu piniartut ilagalugit aammaarlutik ningitsiartorlutik qimusserlutik. Tamatumuuna 565 meterisut itissusilimmi ningitsipput, periuserisaalli taannaaginnarpoq.

Assi: Christian Sølbeck