Gour-mand World Cookbook Awardsimit rekortiliilluni tallimanik nersornaaserneqarnissaanut innersuunneqartoq Saqqummersinneqarfia 18.10.2023
Nerisassiornermut atuakkiaq Inuiaat Marluk Mamartuliaat (danskisut: En smag af to verdener, tuluttut: Taste of Two Worlds) Gourmand World Cookbook Awardsimit qaffasinnerpaat sisamat akornanni ataqqinaataasunik tallimanik nersornaaserneqarnissaanut innersuunneqaqqammerpoq. Nersornaasigassanngortitsinerit taakku, amerlassutsimikkut rekortiliisut, atuagaq arajutsisassaanngitsutut mamartuliugassanut saqqummersinneranik nersorinnipput, taassuma nerisassioriaatsini nunarsuup iluani assut qaffasissumik pikkorissuseqarnermik nutaalioriaatsimillu takussutissiinera pillugu.
Kalaallit, ullutsinni amerikamiut, kiisalu amerikami nunap inoqqaavisa (ukuusut; Maliseet, Micmac, Passamaquoddy aamma Penobscot) kulturiisa killeqarfii qaangerlugit ileqqorisat, ullumikkullu periutsit malillugit nerisanut nerisassiornermut atuakkiaq Inuussutissalerinermik ilinniarfimmi Inuili – Food College Greenlandimi tunngavigisatut ingerlatami ilinniartut aamma University of Southern Mainemi (USM-imi) ilinniartut, Wabanaki Public Health and Wellness’imik, kiisalu Pinngortitaleriffimmik suleqateqarlutik saqqummersitaraat.
Kulturit arlallit peqatigisillugit nerisassiornermut atuakkiornissamut isumassarsiaq 2022-mi aggustimi Arctic Education Alliancep aaqqissuussaatut, tassaasup Kalaallit Nunaata aamma USA-p, Mainemit Alaska tikillugu isumassarsiniarluni angalanermit aallaaveqarpoq, tassani nunatsinni inuussutissarsiutinik ilinniarfinnit allanit aallartitat peqatigalugit Inuili – Food College Greenlandimit Jacob Hansen, ilinniartitsinermut pisortaq peqataasimalluni.
Inuiaat Marluk Mamartuliaat mamassutsip angakkuakkatullusooq tupinnartortaanut aammalu nerisassioriaatsimi sorlarisanut nersorinninneruvoq. Atuakkamiipput nerisassiornermut ilitsersuutit piviusut, nerisassiat akuinik nassuiaatit, aamma Kalaallit Nunaannit USA-millu nerisassioriaatsinik oqaluttuat. Kinguaariiaani kulturinik ilusilersuisimasunik ileqquliussatut nerisassioriaatsit aamma nerisassatigut misigisassat ilinniartut nutarsarlugillu avitseqatigiiffigisimavaat. Ilinniartut nunatsinneersut aamma amerikamiut nerisassiornermut malittarisassianik suliaqarnermik saniatigut atuakkap isikkussaanik suliaqarsimapput, ilanngullugit nittartagaliornerit assiliartalersuinerillu.
Atuartut namminneq nunagisatik pillugit nerisassatigut kultureqarnermik, nerisassiornermut malittarisassanik, aamma tunngavigisatut oqaluttuanik paarlaateqatigiinnerat USA-mi Mainemit aamma Kalaallit Nunaannit ilinniartukkuutaanut taakkununnga marlunnut ilikkagaqarfiulluartumik ingerlatamik pilersitsisimapput.
Jacob Hansen, ilinniartitsinermut pisortaq tapersiivoq: ” Atuakkap iluatsilluarneranut ilinniartut akornanni naapeqatigiinneq, taamatuttaaq, atuakkamut nerisassiat toqqarneqarsimasut pissutaanerpaapput . Kulturit akornanni naapinneq suliamut tunngasutut ilikkagaqarnermik isumassarsinermillu tunisiinnarsimanngilaq, aammali ilinniartut ataasiakkaat attaveqarfiinik annertusaaginnarnani isikkivimmik siammarsaallunilu qaammarsaaffiginnissimavoq, taamatullu ittuunermigut uagutsinnut peqataaqataasunut ataasiakkaanut tamatsinnut silarsuarmik annertusaavoq. Taamatut atuakkiornermik suliniutitsinni ingerlasoqarpoq, aammalu tikilluaqqusinertalimmik ammasumillu nerisassat inuillu naapikkiartortarnerannit taamatut ittoqartassasoq upperaarput.
Gourmand World Cookbook Awardsimit nunarsuarmi pitsaanerpaatut nersornaasigassatut innersuussinerit tallimat suussutsinut makkununnga tunngasuupput:
A15 Nerisassiornermik ilinniarfik
B05 Nerisassiornermik atuagassiatut naqitaq (magasin)
B22 Ilisimatusarfimmit naqitaq
C06 Nunat Avannarlermiut
C22 Issittormiut
Nerisassiornermut atuakkiat nersornaasigassanngortitat tamaasa nittartakkami tullinnguuttumi shortlistiligaasut (piukkussaanerpaat akornanniittut) takusinnaavatit: www.cookbookfair.com
Gourmand World Cookbook Awards tassaavoq nunarsuaq tamakkerlugu unammisitsineq, nunarsuarmit tamarmit nerisassiornermut saqqummersitanik nerisassioriaatsinillu nersorinnittoq. Suussutsini assigiinngitsuni tallimanik nersornaasigassanngortitaanernik pissarsineq tassaavoq immikkut ittutut angusaqarneq, nerisassiornerlu aqqutigalugu nerisassioriaatsikkut, aamma isigisassatut assigiinngisitaassutsimik, aammalu kultureqassutsimik paasisaqarnermik siuarsaaniarlutik ilinniartut pikkorissusaannik pimoorussaqarnerannillu takutitsisoq.
Saudi Arabiami Riyadhimi ull. 27. novembari 2023-mi Gourmand Awardsit 29-ssaat pissaaq.
QR kodemi matumani atuakkiaq akeqanngitsumik qarasaasiaq aqqutigalugu aaneqarsinnaavoq:
Sukumiinerusumik paasisaqarniaraanni attavigisassaq:
Ilisimatusartoq Aaju Simonsen, oq. 361200, aamma maili: ascs@natur.gl nittatrtagaq: natur.gl imaluunniit Inuilimi ilinniartitsinermut pisortaq Jacob Hansen, oq. 661313, email: jaze@inuili.gl, nittartagaq: inuili.gl
Inuili – Food College Greenland suleqatigalugu tusagassiorfinnut nalunaarut Pinngortitaleriffimmit suliarineqarlunilu saqqummersinneqarpoq.
