ICES’ip Tunumi qalerallit suluppaakkallu siunnersuiffigai Saqqummersinneqarfia 22.06.2023

ICES-ip 2024imut Tunumi qaleralinniarnermut suluppaagarniarnermullu tunngatillugu siunnersuinini saqqummiuppai

Qaleralinnut siunnersuissutai 21 541 tonsiupput, tassa siorna siunnersuinerminut naleqqiullugu 20%inik appariaateqartitsiniarpoq. Naatsorsueriaatsip nutaap atulersimanera tamatumunnga patsisaavoq; siornatigut periuserineqartumut naleqqiussissagaanni ullumikkut qanoq sivisutigisumik uumasimanerinut angissusaannullu tunngatillugu paasissutissat ilanngunneqartaleramik, taamaasilluni ukioqatigiiaat takkussuuttut angissusaat alliartornerallu ilanngunneqarsinnaanngortillugit. Qaleqaleqassuserli aalaakkaasumik inissisimavoq peqassutsimut killissarititaasut iluanniilluni. Pinngortitaleriffiup ilisimatuussutsikkut angallataa ”Tarajoq” 2022imiit Tunumi qaleralinnik nakkutilliilerpoq ukiuni arlalinni tamaani nakkutilliisoqarsimanngitsoq. Tamatuma kingunerisaanik siunissami pitsaassuseqarnerusumik siunnersuinerup ingerlanneqalernissaa naatsorsuutigineqarpoq.

Tunumi suluppaagarsuit pillugit siunnersuissutigineqarput 41 286 tonsit pisarineqassasut, tassa 62%inik qaffariaateqartumik. Qaleralinnut tunngasutulli naatsorsueriaatsip nutaap atuutilersimanera tamatumunnga patsisaavoq, periutsimi ukiut aalisakkanilu allannguutaasut ilanngunneqartalermata. Massakkut suluppaagarsuaqarluaqaaq ukiunili arlalinni pisarineqarsinnaanngortussanik takkussuuttoqannginnera ernumasitsivoq. Pisarineqarsinnaanngortussanimmi nutaanik takkussuuttoqanngippat tava peqassuseq ikilissaaq tamatumalu kingunerisaanik siunnersuineq appartussaassalluni.

Suluppaakkat itisoormiut Tunumiittut (nunatta qaarsoqarfiata killeqarfiata itiseriarnerani) peqassutsimik naliliinissamut paasissutissat nalunaarsukkat ikippallaarput. Misissuinerni peqassuseq oqimaassusinngortillugu missiliuussilluni naatsorsuinerit ukiuni arlalinneersut aallaavigalugit suluppaakkat itisoormiut aatsaat taamak ikitsigimmata, ICES’imiit innersuussutigineqarpoq mianersortumik periuseqarnissaq naapertorlugu 2024imi aalisarneqassanngitsut.

Suluppaakkat taakkua marluk, suluppaagarsuaq suluppaagarlu itisoormioq assigiinngiiaartunik aalisarnermi pisarineqartarput sorliunerilu takujuminaatsorujussuusarlutik. Taakkualu marluk peqassusiisa naliliiffigineqarnissaanut tamanna pisarioqutaasarpoq, taamaattumik ICES innersuussuteqarpoq suluppaakkat taakkua marluk immikkoortillugit naleqqussaasuumillu aqunneqassasut.

Sukumiinerusumik paasisaqarniaraanni attavigisassaq:

Aalisakkanut Qalerualinnullu Immikkoortortaqarfimmi pisortaq Helle Siegstad. helle@natur.gl oqarasuaat 361200.

Siunnersuineq sukumiinerusumik paasisaqarfigisinnaavarsi UANI