Immami nillertumi koral-it ajugaapput Saqqummersinneqarfia 23.06.2023
Imaani itisuumi koral-it pillugit nunat tamalaat arfineq-pingajussaanik isumasioqatigiinneranni Sandra Maier, Kalaallit Nunaanni Silap Pissusianik Ilisimatusarfimmi ilisimatuutut misissuisoq (postdoc-forsker) Kalaallit Nunaanni koral-it pillugit saqqummiivoq, oqalugiallaqqinnerpaatullu akissarsitinneqarluni.
Imaq itisooq taartoq nillertorlu erlinnartorpassuarnik toqqortaateqarpoq. Taakku ilagaat koral-eqarfik. Nunani kiattuni tamakkoqartarmat inuit amerlanerpaat nalunngilaat. Koral-eqarfiilli immami nillertumi aamma nassaassaasarput – amerlaqisullu Kalaallit Nunaanniittuupput!
Immami nillertumi koral-it uumassuseqassutsit ataqatigiiffii mianernartut pilersittarpaat, taakkulu uumasoqatigiinnut assigiinngitsorpassuarnut angerlarsimaffiusarput imaanilu uumasoqassutsit ataqatigiiffiit piujuarnissaannut atorneqartarnerannullu pingaaruteqarput. Uumasoqassutsit ataqatigiiffii immap naqqani qassutinut aamma silap pissusiata allanngorarneranut sunnertiasuupput.
Immap naqqata nunap assiliornera imaani uumasoqassutsit ataqatigiiffi paasisaqarfigissagaanni pisuussutillu uumassusillit aqunneqarnerat eqqarsaatigalugit pingaaruteqarpoq, Sandra oqarpoq. Nakkutiginnilluni suliniummi INAMon-imi, immap naqqani uumassusillit ataqatigiinnerat pillugu immikkut ilinniarsimasup Nadescha Zwerschkep ingerlataani, immap naqqa imaani misissoqqissaarparput, Sandrallu suliniutaani Kalaallit Nunaanni kangerlunni immap naqqa misissorparput.
Sandrap saqqummiinermini 2015-iminnganniit siuariarsimanini oqaluttuaraa, aammali unammillernartut pillugit oqaluttuarpoq. Unammillernartoq immikkuullarissoq uani nunat tamalaat pillugit eqqartuinitsinni taassallugu pingaartitarput tassaavoq ”fly in fly out”, tassalu ilisimatuutut misissuisunik nunanit allaninngaanneersunik timmisartukkut suliartuussisarnernut tunngasoq. Taamaaliornikkut sumiiffinni inuiaqatigiit sulinermi ilanngunneqarneq ajorput imaluunniit sumiffinni suliffeqarfiit assartuinerup saniatigut suleqatigineqarneq ajorput.
