Immap naqqata uumassuseqarnera Saqqummersinneqarfia 20.07.2023
Nunatsinni innuttaasut amerlanerpaartaasa aalisakkat nalinginnaasumik suunersut ilisimavaat – ingammik aalisakkat pisiniarfinni kalaalimineerniarfinnilu pisiarineqarsinnaasartut ilisimalluarlugit. Uumasulli qiteraleqanngitsut immami immallu naqqani uumasuusut ikittuinnarnik ilimaneqartarput. Immalliuna naqqani uumasuusut immami uumasoqatigiiaanut pingaruteqarluinnartuusut!
Immami immap naasuarai tappiorannartut seqerngup qinngorneranik immallu tarajullip uumaneqartitsisarnerinut pinngorartitsisartuupput – tassa nerisassat – uumasuaraqarnissaanut, aalisagaqarnissaanut annernillu uumasoqarnissaanut toqqammaviliilluinnartuupput. Naasuaqqat tappiorannartut uumassusillilu toqugaangamik taava naqqanut kiviartuaartarput, soorlu pujoralaat pisattatsinnut naqqinullu qalliisarnerisulli qalliisarlutik. Immap naqqani uumasut arlallit immap naqqata ’støvsugerai’, iluarsaassillutillu uumassusilinnik nerisaqartartut.
Itisuup raajai – tassa Tarajoq’p ukiumoortumik misissugaasa pingaarnersarisartagai – immap naqqani narsaamanersuartutullusooq ittuni ajunngilluinnartumik atugassaqartarput, uumassuseqarsimasut salinnissaannut pisussaaffeqaatigalutik aalisagarpassuarnut aningaasarsiutaasinnaasunut nerisassaasaramik. Sangujaat, uumasuaqqat puujusatut isikkullit, inalugallit, uillut, koral’it, siuteqqut allallu imaani uumasuusut immap naqqanik saliisartuupput, taakkualu uumanerisa uumasoqatigiiaat ingerlaarnerannut iluaqutaasarput.
Ullumikkut aalisarfiusartut naqqi ukiut untritillit affaata matuma siornatigorninngarnik allaanerujussuanngornikuupput. Soorluttaaq sineriak qaqqallu aamma allanngorsimasut, inuimmi najugaqarfigiligaanni sumiiffiit allanngorluinnarsimapput, illorsualiorfigineqarlutillu aqqusinniorfigineqarnikuugamik, taamatuttaaq immap naqqi raajanik aalisakkanilluunniit kilisaffigineqarnikuugamik. Taamaattumik pingaaruteqartuuvoq immap naqqisa nutaanerpaanik ilisimasaqarfigisuarnissaat, immammi naqqani uumaneqarneq aalisakkat uagullumi pinngitsoorsinnaanngilarput, nutaanerpaanillu ilisimannilluta siunnersuisinnaasuartussaavugut aalajangiisussat kisitsisinik aallaaveqarsinnaaniassammata– taamaaliornissarmi raajat MSC-mik ilisarnaateqartuarnissaannut pingaaruteqartuummat. Tarajoq’llu ukiut tamaasa misissuisarneri tassa tamakkununatigut iluaqutaasarput.
