Silap pissusaata allanngoriartornera immap pissusaanut, miluumasunut timmissanullumi sunniuteqaqaaq Saqqummersinneqarfia 09.05.2023

Nunani tamalaani imaani ilisimatusarnermut ataatsimiitsitaliaq ICES (International Council for Exploration of the Sea) Nunatta Kangiani, Tunumi, imaani uumassuseqaqatigiit pillugit nalunaarusiamik saqqummeeqqammerput. Nalunaarusiaq ICES’imi immikkut ilisimasallit tamaani uumassuseqaqatigiinnut akuliuttunik naliliiffigineqarnissaannut immikkut ilisimasallit suliaannik aallaaveqarpoq, DTU Aqua’milu ilisimatuumit Colin Stedmon-imik Pinngortitaleriffimmilu ilisimatusartuunermit Jesper Bojemit aqunneqarput.

Kangiata imartaa, nunap toqqavia tamaat ilanngutissagaanni, 1,2 million km2-sut annertussuseqarpoq allorniusallu avannamukaartut 20-t aqqusaarpaat, uumasoqatigiinnut assigiinngiiaaqisunut soorlu imaani timmissanut, puisinut, arfernut aalisakkanullu uumaffissuulluni. Sumiiffik marlunnut aggulunneqarsinnaavoq avannarpasissoq nillertumik imiunerusumik imartalik, kujasinnerusullu tarajuunerusumik kissarnerusumillu imartalik ukiullu ilaani sikorsuaqartarluni.

Sumiiffik aalisartoqarfiuvoq, minnerunngitsumik avataatungaa nunat assigiinngitsut aalisartuinut pingaaruteqarluni, aalisagaqatigiillu aalisarneqarsinnaassusii angullugit aalisarneqartarput suluppaakkat ikerinnarsiortut eqqaassanngikkaanni.

Sumiiffimmi najugallit sinerissap qanittuani aalisarneq piniarnerlu ingerlappaat, uumasoqatigiillu assigiinngitsut ikilisimanerinik kinguneqarluni minnerunngitsumik natsersuit, qilalukkat qernertat aataallu.

Sumiiffimmi inuit sunniutaat ikeqaat, sumiiffilli tamanna ungasissumeersuniit imaani mingutsitsinernit eqqugaanerit ilagaat.

Silap pissusaata allanngornera Kangiata imartaanut sunniuteqangaatsiarpoq. Aasaanerani ukiuuneranilu sikuusarnera annikillingaatsiarsimavoq. Immallu qaavani tarajuussutsip kissassutsillu allannguutaat takussutissaqarlutik. Uumasut assigiinngitsut siammarsimassusaat aamma allannguuteqarsimavoq, soorlu avaleraasartuut, tun, qipoqqaat, mitit oqaatsullu.

Silap pissusaata allanngorneratigut, aalisarpallaarnerup, mingutsitsinerup, immap seernarsineratigut uumassusillillu avataaneersut takkussuunnerisigut sunniutit siaruarlutik nerisareqatigiinnut uumassusillillu assigiinngisitaarnerinut sunniuteqarsinnaapput. Sunniutit malinnaaffigeqqissaarnissaat pingaaruteqarpoq piujuartitsinissaq qulakkeerniarlugu Kangiatalu imartaata nunarsuarmi tamarmi imartat pitsaasumik ineriartornissaanut inissisimanera eqqarsaatigalugu.

Kalaallit Nunaanni aalisarnermik aqutsiveqarfiisa allanngutsaaliuneq eqqarsaatigalugu nalunaarut atortarpaat. Aalisarnermillu ingerlatsisut nalunaarut meqqiliinissaq eqqarsaatigalugu atortarlugu.

Kangiata imartaani uumassusillit ataqatigiinneri pillugit nalunaarusiaq takuneqarlunilu aaneqarsinnaavoq uani Greenland Sea Ecosystem Overview in ICES library taamatuttaaq tusagassiutinut nalunaarut tuluttooq uani takuneqarsinnaalluni https://www.ices.dk/news-and-events/news-archive/news/Pages/Greenland.aspx