Nuup siunissaa 2035 Saqqummersinneqarfia 17.11.2023
Siunissaq pillugu takorluuisitsilluni eqimattakkuutaarluni sulinerit immikkuullarissumik ilusillit ingerlanneqarnerat iluatsippoq, taakkulu allaanerusumik aamma suliat assigiinngitsut akimorlugit peqataaffigineqartumik Nuup siunissaa 2035 pillugu oqaloqatigiissitsinerupput.
Ilisimatusartoq aamma suliamik ingerlatsisoq Pinngortitaleriffimminngaanneersoq eqimattanik ulluni marlunni sulisussanik aaqqissuussivoq, sinaakkutaalu naleqqussakkat imaapput:
- Innuttaasut aamma kultoorilerisut takornarialerisullu qaaqquneqarput. Kommuunini ingerlatsivinni sulisut aalajangiisartullu aamma Namminersorlutik Oqartussani naalakkersuisoqarfinni assigiinngitsuninngaanneersut, soorlu inuussutissarsiornermut, aalisarnermut piniarnermullu naalakkersuisoqarfinninngaanneersut qaaqquneqarput. Kattuffiit soqutigisaqaqatigiiffiit soorlu avatangiisinut, pinngortitamut, aalisarnermut, piniarnermut aamma kultoorimut sammivillit aamma qaaqquneqarput. Peqataaniarlutik nalunaarsimasut 30-t eqimattanut assigiinngitsunik aggerfilinnik inuttalersukkanut inissinneqarput, tamannalu susassaqarfiit akimorlugit oqaloqatigiinnermik pilersitsivoq.
- Oqaluuserisassatut qulequtarineqartut nutaamik katiternerisigut takornariaqarneq, kultoori, aalisarneq aamma piniarneq, silaannaap pissusaata allanngornera aamma piujuaannartitsisumik inuussutissarsiutit ineriartornerat allaanerusumik assigiinngisitaartumillu oqaloqatigiinnermik pilersitsipput.
- Oqalutseqannginnissaq aalajangiunneqarnikuuvoq, peqataasussallu oqaatsit suut atorlugit peqataarusunnersut aperineqarnikuupput. Peqataasut eqimattani kalaallisut imaluunniit qallunaatut oqaluffiusunut inissipput, tamannalu oqaloqatigiinnermik atasuinnarmik pilersitsivoq.
- Naapinnerit tamarmik eqimattani oqaloqatigiinnernut atorneqarput, taamaalilluni piffissaq saqaqummiinernut eqimattallu saqqummiinerannut atorneqanngilaq. Peqataasut ataasiakkaat oqalunnissamut piffissaqartitaammata peqataasut tamarmik eqimattani oqaloqatigiinnerni peqataapput.
Nuup siunissaa ukioq 2035 pillugu eqimattat oqaloqatigiinneranni kissaatit, periarfissat ulorianarsinnaasutullu isigisat oqariartuutigineqarput. Kristine Lynge-Pedersenip eqimattat oqariartuutaat siunissaq pillugu takorluukkat 35-tut ilusilerlugillu katiterlugit allassimavai. Ataasiakkaat ulorianarsinnaasutut nalilikkanik imaqarput, annertunerpaarli periarfissat kissaatillu pillugit takorluugaallutik, taakkulu inassuteqaatini aamma atuarneqarsinnaapput.
“Eqimattakuutaarluni oqaloqatigiinnerit assigiinngisitaartumik suliallu akimorlugit ingerlanneqartut iluatsilluarput, siuissaq pillugu takorluukkat 35-t peqataasut inuiaqatigiinnut tunniussaraat nalituut. Inuiaqatigiinni suliallit assigiinngitsut maanna apeqqutaalerput, nalunaarutip imarisaasa qanoq atornissaa eqqarsaatigalugu”, Kristine Lynge-Pedersen oqarpoq.
Ulorianarsinnaasut aporaannerillu aqutsinikkut nakkutilliinikkullu anikillisinneqarsinnaapput
Sumulluunniit attuumassuteqanngitsutut isigaluni naliliissagaanni takorluukkat 35-t tamarmik soqutiginarput aamma ataaniitut assersuutit nalaatsornerinnakkut toqqagaapput.
Ulorianarsinnaasutut takorluugaq taneqartoq tassaavoq “Takornarianut sammisassaqartitsinerit massakkutut itsillugu sukkasuumik amerliartuinnartut pillugit ernumaneq… Ataatsimoortumik ataqatigiissaarinerup amigaataanera sammisassaqartitsinernut assigiinngitsunut nunap ilaani imaluunniit kangerlunni aalajangersimasuni aporaannermik kinguneqartarpoq. Pisortatigoortumik takusassiap amigaataanera peqqutaalluni pissutsit naatsorsuutigineqanngitsut pinngorsinnaapput. Takornarianut sammisassaqartitsinerit sukkasuumik amerliartortut aqunneqarnissaat nakkutigineqarnissaallu naorninartoqarsinnaavoq, aamma avatangiisinut mingutsitsisumik ajutoortoqarnissaanut ajornerpaamillu pisoqassappat inunnik ajoqusertoqarneranik kinguneqartumik pisoqarnissaanut piffissaq apeqqutaaginnarpoq”.
Kissaatit pillugit takorluukkat ataani atuarsinnaasatit tassaapput ulorianarsinnaasutut takorluukkanut qulaani taaneqartunut aaqqiissutissatut siunnersuutit.
”Suleqatigissitanik assigiinngitsunik sulialinnik inuttaqartunik pilersitsoqassaaq, taamaalilluni umiarsuit takornariartaatit atorlugit takornariaqarnerup takornarianullu sammisaqartitsinerit allat ataqatigiissarneqartarnissaat aqunneqartarnissaallu pillugit. Ataatsimoorluni ataqatigiissaarineq aqutsinerlu kissaatigineqarput, taamaaliornikkut inooqatigiissinnaaneq aamma avatangiisinut kultoorimullu pitsaasumik takornarialerineq qulakkeerneqassammata. Oqartussat suleqatigiissitanik pilersitsissapput, taakkulu naalakkersuisoqarfinni susassaqarfiit akimorlugit aamma soqutigisaqaqatigiiffiit aallartitaannik sullissisunillu allanik inuttalersorneqassapput”.
Piujuaannartitsineq pinngortitseqqiinerlu
“Takornarialerineq piujuaannartitsineq tunngavigalugu isumalluutinik atuinissamik, suliffinnik pilersitsinissamik aningaasanillu isertitassanik periarfissanik eqqarsarluni kisimi ineriariartortinneqassanngilaq. Takornariaqarnerli aamma kultoorip pinngortitallu pinngortitseqqissinnaasaanik ineriartortitsiviussaaq. Soorlu assersuutigalugu takornariaqarnermik inuussutissarsiornerup kultoorikkut naleqartitat aamma inuit kultooritoqaaninngaannneersut ileqqut eqquteqqinneqarsimasut atorsinnaavai. Pinngortitamut aamma pinngortitami isumalluutinut tunngatillugu takornarialerisut takornarianut pinngortitap iluarseqqinneqarnissaanut atatillugu aaqqiissuussisinnaapput”.
Eqimattakkuutaarluni sulinerup inernera inuiaqatigiinnut tunniunneqassaaq
Inernerit aalajangiisartunut innuttaasunullu tamanut tunniunneqarnissaat eqimattakkuutaarluni sulineq naggaserlugu kissaatigineqarpoq. Nalunaarutip matuma tamanut saqqummiunneqarnerani peqataasut siunissaq pillugu taorluugaat inassutaallu matumuuna saqqummiunneqarput. Nalunaarut uani atuarneqarsinnaavoq.
Annertunerusumik paasissutissat, attavissaq:
Ilisimatusartoq aamma suliamik ingerlatsisoq Kristine Lynge-Pedersen, oqar.: 361218, krlp@natur.gl
