Oqaluttuarisaanermi aatsaat nannut taamak siamasitsigisumi kisinneqaqqaalersut Saqqummersinneqarfia 13.04.2023
Pinngortitaleriffik aatsaavissuaq Tunumi (Nunatta Kangiani) nannunik kisitsileruttorpoq. Kisitsineq 22. marts aallartinneqarpoq, maajip aallartilaarnerata tungaanut ingerlanneqartussaalluni. Tunup kujataani avannarpasissuseq 64° missaanniittumiit Peary Landimut, tassa Kitaata avannaarsuata tungaanut nannut timmisartumik kisinneqartussaapput. Pinngortitaleriffiup ilisimasaa malillugu nunarujussuaq aatsaat taamak annertutigisoq timmisartumik kisitsiffiusussaavoq.
-Una kisitsineq ingerlanneqartoq ukiuni arlaqartuni pilersaarusiorlugulu piareersarsimavarput. Ukioq 2014 aamma 2015 apersuilluta misissuineq aallartipparput, ilaatigut piniartut apersorsimavagut sumiiffiit kisitsiffissat ukiullu qanoq ilinerani kisitsisoqarnissaa piukkunnarnerpaajussanersut paasiniarlutigit, Fernando Ugarte, Miluumasunut Timmissanullu Immikkoortortaqarfimmi pisortaq oqaluttuarpoq.
Tamatuma kingorna ornigulluta misissuinerit arfinillit aqqutigalugit nannut satellitsikkut attaveqaatilinnik nalunaaqutsersorsimavagut, qanoq siaruarsimatiginersut nikitsigisarnersullu paasisaqarfiginerorusukkatsigit. Kisitsiffissaq nunarujussuuvoq, Tunullu kujataani ukiut 2015, 2016 aammalu 2017 misissuisoqarpoq, taamatuttaarlu Tunup avannaani kisitsiffissaq tamakkerniarlutigu ukiut 2018, 2019 kiisalu 2022 misissuisoqarluni.
-Nualluussuaq covid-19 peqqutigalugu ukiuni marlunni kinguaattoorsimavugut, taamaattumik nannut qungasequserlugit nalunaaqutserneqartut kingulliit 2022imi aatsaat nalunaaqutserneqarsimapput, naak 2020imi nalunaaqutserneqarnissaat pilersaarutaasimagaluartoq, Ugarte nassuiaavoq.
Kisitseqataasussallu Nunatsinniit, Danmarkimiit, USAmiit, Norgemiit, Canadamiillu aggertartussaapput, tamarmillu timmisartumik kisitsinermik nannunullu tunngasutigut misilittagaqarluartuullutik. Kisitseqataasussat piniartunik Tasiilameersunik, Kulusummeersunik kiisalu Ittoqqortoormeerneersunik ilaqartussaapput, kisitsisussallu qasunnginniassammata holdinut pingasunut avinneqarnikuupput, Fernando Ugarte nassuiaavoq.
Kisitsinerit inerneri piujuartitsiniartumik piniartoqartarnissaa anguniarlugu siunnersuinissanut, inuillu ingerlattagaasa pilersaarusiorfiginissaannut minnerunngitsumillu silap allanngoriartornerata sunniutaanik paasinninnerulernissamut atorneqartussaapput.
Kisitsinerujussuaq danskit avatangiisinut aqutsisoqarfiannit Miljøstyrelsemit aammalu Tunup Avannaarsuani uuliasiorlutik misissuinissaminnut akuersissummik tunineqarsimagaluartunit aningaasartuutit amerlanerpaartaat matuneqartussaapput.
Sukumiinerusumik paasisaqarniaraanni attavigisassaq:
Sukumiinerusumik paasisaqarniaraanni attavigineqarsinnaavoq Miluumasunut Timmissanullu Immikkoortortaqarfimmi pisortaq, Fernando Ugarte. feug@natur.gl, mobil +299 522401
Assiliisoq: F. Ugarte
