Qeqertarsuup imaani nipit LIVE’rlugit Saqqummersinneqarfia 28.07.2023
Nipinik naalaarut nutaaq Qeqertarsuup Tunuani miluumasut sorliit najuunnerannik paasisaqartitsisussaq pilersinneqarpoq – ukioq kaajallallugu tusarnaarneqarsinnaasussaq. Nipit Qeqertarsuup Tunuani pinerisa nalaanni toqqaannartumik nassiussorneqartussat tamanit tusarnaarneqarsinnaasussaapput. Nipinillu aallakaatitsivik 2024imi upernaakkut ammassaaq.
Nipinik nakkutilliisarfik Qeqertarsuarmi Qaqqaliamit siammarterneqartartussaavoq, immallu iluani nipi tusaaneqarsinnaasut tamaviisa ulloq unnuarlu ukioq kaajallallugu aallakaatinneqartartussaapput. Nipit nalunaarsorneqartut ilaatigut aamma uumasoqatigiiaat tamaaniittartut allannguuteqassappata allannguutaannik nassuiaassutaasinnaasussaapput kiisalu imaani inuit qanoq nipiliortitsitiginersut aamma paasineqarsinnaalertussaassalluni. Nipit immiussorneqartut tamanit malinnaaffigineqarsinnaasussaapput aamma Qeqertarsuarmi Qaqqatoqqami qarasaasiakkullu attaveqaatit aqqutigalugit qarasaasiani aalajangersimasuni Nunatsinni Danmarkimilu katersugaasivinni saqqummersitsisarfinnilu tusarnaarneqarsinnaasussaapput. Taamaasilluni nipit Qeqertarsuup Tunuani immameersut toqqaannartumik nunarsuaq tamakkerlugu naalaarneqarsinnaanngortussaapput.
Suliniummi Qeqertarsuup illoqarfia, Issittoq pillugu misissuisarfik, Pinngortitap Oqaluttuarisaanera pillugu Naalagaaffiup Katersugaasivia, Seiche Marine Acoustic Solutions, Visit Greenland, (nunatta takornariartitsisarfia), Pinngortitaleriffillu tamarmik suleqataapput. Suliniut Kunngissap Frederiup nuliatalu kronprinsesse Mary’p aningaasaateqarfianit, Carlberg foundationimit, Aage V. Jensen charity foundationimit aammalu Disko Hotelimit aningaasaliiffigineqarpoq.
Qeqertarsuup Tunua 2012imi Kalaallit Nunaanni imartat sallersaalluni inissinneqartussatut inissinneqarpoq. Tassa sumiiffik tamanna uumasoqatigiiaat eqqarsaatigalugit nalituutut inissisimasuuvoq, inuillu ajoqusersuinerinut malussajasuulluni. Issittormi inuit aallussiffiginissaannut tikikkuminarnerulernikuuvoq, soorluttaaq umiarsuartigut, taamaattoqarneratalu immap iluani nipit ingasannerulersinnikuuvaat. Ilisimatusarnikkut paasinarsinikuuvoq nipit miluumasut nalinginnaasumik avatangiiseqarnerinut ajoqutaallutillu sunniisartut.
Nunatta kitaaniittoq Qeqertarsuup Tunua issittumik immikkuulassumiippoq uumasut tamaaniittut assigiinngiiaartuugamik. Issittumik uumasorpassuarneq atlantikumilumi miluumasorpassuarnik ukiup ingerlanerani allanngorartumik najorneqartarami. Assersuutigalugu Qeqertarsuup Tunua arfivinnut katersuuffissuuvoq. Ukiut tamarluinnaasa arfiviit 500 aamma 1.000it akornganni amerlassusillit januaarimiit juunip aallartinnerata tungaanut katersuuffigisaramikku.
Sukumiinerusumik paasisaqarniaraanni attavigisassaq:
Miluumasunut Timmissanullu Immikkoortortaqarfimmi ilisimatusartuuneq Outi Tervo, outi@ghsdk.dk