Raajat ikinnerusut 2024imi aalisarneqarsinnaassapput Saqqummersinneqarfia 21.09.2023
NAFO’p raajartassanik 2024imoortunik siunnersuinera 2023imut sanilliullugu 15.000 tonsinik appasinneruvoq. Tassami 2024imi raajat 95.000 tonsit Nunatta Kitaani aalisarneqarsinnaasussaammata. Tunumili raajartassat 2024imi 500 tonsinik amerleriassapput, 2024imut raajartassatut 2.500 tonsit siunnersuutigineqarmata. Siunnersuineq Naalakkersuisunut tunniunneqareerpoq, taakkualu raajat qassit tonsit nunatsinni pisassiissutaassanersut aalajangigassaraat.
Nunatta Kitaani siunnersuinermut aallaavigineqarput peqassutsimik naliliinerit aalaakkaasumik raajaqarneranik tikkuussisut, taamaattorli pisat ningitsinikkaaraanni pisarineqartartut appariaateqarsimasut, tamatumalu saniatigut ukiuni kingullerni aamma saarulleqarnerulersimalluni, raajartortoqarneranik kinguneqartussamik. Tamakkualu kingunerisaanik peqassutsimut ilanngaataasussat ukiup tulliani 50%imik qaangerneqarneranik kinguneqariaannaavoq.
Kitaata avataani kilisaatit juulip naanissaata tungaanut Kitaata sikorsuinik ajornartorsiortitaasarsimapput (akerlianik sinerissap qanittuaniittut sunnerneqarsimanngitsut). Sikorsuit Pinngortitaleriffiup kilisalluni misissuineranut aamma ajoqutaasimaqaat, sumiiffiillu ilaanni 2023imi misissuisoqarsinnaasimanani. Paasissutissat raajaqassutsimut tunngasut sumiiffiit ilaanni amigaataanerisa kingunerisaanik ukiuni kingullerni tallimani siunnersuinerit agguaqatigiisinneqarneri siunnersuinissamut atorneqarsimapput, siunnersuinerlu 2024imoortoq taamaasilluni nalinginnaasuminngarnik nalorninartoqarnerusinnaavoq.
Tunumi 2023imi raajaqassuseq 2023imi peqassusaata oqimaassusinngortinnerata annertunerpaaffiata ataaniippoq, peqassutsimullu ilanngaataasut annertunerpaamik annertunerulluni. Aalisartoqarpiarsimanngilaq, taamaattumillu pisat ataasiakkaarlugit sumiiffik tamakkerlugu peqassutsimut naapertuunnersut oqaatigiuminaappoq. Tamakkua saniatigut misissukkat oqimaassusinngortikkaanni 2020imi aammalu 2022 aammalu 2023imi kiisalu 2014imiit Tunumi aasarnerit Dohrn Bankep eqqaaninngaaneernerusimapput.
Annerusumik paasisaqarniaraanni: Aalisakkanut Qalerualinnullu Immikkoortortaqarfimmi Siunnersortaaneq ilisimatusartartorlu AnnDorte Burmeister attavigineqarsinnaavoq oqarasuaatikkut +299 361200 imaluunniit mail: anbu@natur.gl aqqutigalugu.
