Saarulliit pillugit Siunnersuineq 2024 Saqqummersinneqarfia 22.06.2023
Siunnersueriaaseq allanngortinneqarpoq siunissami saarulliit sumi suffisimaneri aallaavigalugit siunnersuisoqartalissagami
Saarulliit pillugit siunnersuineq 2024mut katillugu 29 011 tonsiuvoq. 2022imi saarullittarineqarsimapput 42 060 tonsit, taakkunannga 20 027 tonsit Dohrn Bankemi pisarineqarsimallutik.
Siunnersuinermut tunngaviusartut annertuumik allannguiffigineqarsimavoq, massakkullu sisamanik assigiinngitsunik siunnersuisoqassaaq – tassa suffisartoqatigiit sisamaasut aallaavigineqartussat ukuullutik:
- Kalaallit Nunaata Kitaata avataani saarulliit suffisartut
- Kalaallit Nunaata Kitaata avannaatungaani sinerissap qanittuani saarulliit suffisartut
- Kalaallit Nunaata Kitaata kujasinnerusortaani sinerissap qanittuani saarullit suffisartut
- Tunup Islandillu avataanni saarulliit suffissartut
Saarulliit suffiffimminnut atasarput. Saarulliillu suffinngikkaangamik allanut ingerlaartartuupput. Assersuutigalugu Kalaallit Nunatta Kitaani suffisarfinnit arlalinneersunit saarulleqartarpoq, taamaasillutillu aalisartut suffisarfinnik assiginngitsuneersunik saarullittarlutik. Saarulliit sananeqaatimikkut assigiinngiiaartuummata Pinngortitaleriffiup pisarineqartut saarulleqatigiiaanit sorlernik akoorneqarsimanersut malinnaaffigisinnaasarpai immikkoortillugillu peqassusii naliliiffigisinnaasarlugit. Nunatta Kitaani suffisartunut siunnersuineq 5 493 tonsiutinneqarpoq. Taakkununnga ilanngunneqassapput ’Tunup Islandillu avataanni saarulliit suffisartut’ uumanermik ilaanni Kalaallit Nunaata Kitaaniittartut.
Qanoq akoorneqarsimaneri apeqqutaasarput.
Saarulliit sumi suffisarneri aallaavigalugit siunnersuisoqarmat, taamaattumik sumiiffiit aallaavigalugit aalisartoqartarnissaaninngarnik siunnersuineq allaaneruvoq. Naalakkersuisummi pisassiiniaraangamik Kalaallit Nunaata Kitaani sumiiffiit aallaavigalugit pisassiisaramik, maannakkulli saarulleqatigiiaat suminngaaneersut sumiiffimmi aalajangersimasumiinnerat aallaavigalugit pisassiisoqartalernissaa pisariaqalersimavoq. Pisassiivallaartoqarpammi saarulleqatigiiaat Kalaallit Nunaata Kitaaneersut ilaat ataaseq marlulluunniit pisaqarfigivallaarneqarsinnaassammata.
Saarulleqatigiiaat ’Tunup Islandillu avataanni saarulliit suffisartut’ saarulleqatigiiaanik arlalinneersuugaluarput, ICES’illi maannamut ataasiusutut naliliiffigalugit suliarisarpai. Tunumimi saarulliit qanoq nikittarnerat sumilu suffisarnerat sukumiisumik naammattumillu ilisimaneqanngikkallarpoq, Kalaallit Nunaata Kitaani siunnersuinertulli qularnaatsumik siunnersuinissaq anguniarlugu immikkoortiternissaat pineqartillugu, qularnaatsigisumik suli naliliiffigineqarsinnaanngikkallarmata. Siunnersuineq 23 518 tonsiuvoq (Kalaallit Nunaat tamakkerlugu atuuttumik). Saarulliit Tunup Islandillu avataanni suffisartut sananeqaatimikkut immikkuullarissuupput. Tunumilu Dohrn Bankemi aalisarnerit annertunerpaamik ingerlanneqartarput, taamaattuartariaqarlunilu.
Sukumiinerusumik paasisaqarniaraanni attavigisassaq:
Aalisakkanut Qalerualinnullu Immikkoortortaqarfimmi pisortaq Helle Siegstad. helle@natur.gl oqarasuaat 361200. Aatsaalli ullumi nal. 13.00 kingorna oqaaseqartitsisinnaavugut.
Siunnersuineq sukumiinerusumik paasisaqarfigisinnaavarsi uani
