Silap allanngoriartornera pineqaqaaq Saqqummersinneqarfia 16.11.2023
Nunatsinni silap allannngornera nammineq isitsinnik takusinnaavarput. Sapaatip akunnerata siuliani Greenland Science Week (GSW) Nuummi ingerlanneqarmat silap allanngoriartornera arlalinnik oqalugiaatigineqarpoq.
Ilisimatusartartut arlallit saqqummiussiffigaat imaq kissarnerulerpat immap naqqa qanoq allannguuteqassatiginersoq. Ilisimatusartartut aamma nassuiaatigaat immami avatangiisit qanoq innerat malillugit tamaani uumasunut qanoq sunniuteqartigisarnera. Imarmi kissarnerulerpat avatangiisit allannguuteqartussaagamik, issittumilu uumasut avannarparternerusussaassallutik. Ilisimatusartartut ilaasa immap kissassusaa tarajoqassusialu ukiuni arlalinni misissugarisimavaat, ilaasa uumasut aalajangersimasut malinnaaffigiutigalugit sumiiffiinni aalisartut piniartullu paasiniaaffigisarsimavaat, tamaalilluni ilisimasaat misigisaallu najukkaminni allannguutaasut ilisimatusartartut uuttortagaannut ilanngunneqartarlutik.
Ilisimatusartartut allat oqaluttuaraat sermit uukkartarfiit imaaniittut, uumaneqartitsisuusut, erngup sermersuarmeersup sermip ataatigut kuunnermigut kangerlummi uumassutissanik pilersitsisarmat, erngup uumassutissat immap naqqaniit qaamanermut illuartittarmagit taamaasillutillu planktonip nerisassaqartilertarlugit. Sermillu uukkartarfii nunami isuliffeqalerunik imaani uumaneqartitsineq tamanna unittussaavoq, kangerlummilu uumaleqarnerulersitsiuarneq apparujussuartussaassalluni.
DNA-mik misissuinerit
DNAmik misissuinerit aamma oqalugiaatigineqarput, assersuutigalugu qalefrallit Atlantikup avannaani suni qaleraqatigiiaaqarnersoq nalunaarsorsinnaaniarlugu misissuiffigineqartarput. Taamatuttaaq saarulliit aamma DNAvi aamma misissuiffigineqartarput.
DNAmik misissuinerit atorlugit aamma ilisimasaqalersitsisarpoq, uumasut qanoq immap kissassusaanut assigiinngitsunut tulluarsallaqqitsigineri ilisimasaqarfigilerniarlugit. Taamaattumik ullumikkut oqaatigineqareersinnaavoq qilalukkat immami kissartumi uumaannarsinnaanissaat nalorninartoq, illuatungaani arfiviit uumaannarsinnaalluartussaassasut. Uumasut ilalisaataasa assigiinngiiaassusii naalagaasaramik silap allanngorarneranut uumasup tulluarsarsinnaassusaanut.
Ilisimatusartartut pineqartut pillugit oqaluartut assingi uani isiginnaarsinnaassavatit.
