Suluppaakkat arriitsuaqqamik alliartortarput Saqqummersinneqarfia 05.06.2023
Suluppaakkat utoqqaliartuinnarnerminni alliartornerat arriilligaluttuinnartarpoq. Aalisakkammi tamarmik utoqqaliartornerminni alliartornerat arriilligaluttuinnartarami, suluppaakkalli utoqqalisaqigamik alliartornerat suli arriinnerusarpoq. Tamatumunnga takussutissaalluarput suluppaakkat Nuup Kangerluani Ameralimmilu pisarineqartartut. Kangerlunni taakkunani suluppaakkat taamatoqqissaaq angissusillit – utoqqaat – ukiumiit ukiumut pisarisuartarpagut. Sannamiillu kilisalluta 2015imi misissuilluta aallartikkattali suluppaakkat angissusaat allannguuteqarsimanngilaq. Suluppaakkat kangerlunni taakkunani pisarisartakkagut ukiunik arfineq-pingasunik utoqqaaneruliinnarnikuupput. Suluppaagaaqqallu sinerissap qanittuaneersut avataaneersullu takkussuuttartut qaqutigoortorujussuusimapput taamaattumik kangerlunni taakkunaniittut utoqqaangaatsiarput. Qujanartumilli allanngoriartortoqarpoq, tassami 2020miilli suluppaagaaqqat pinngoqatigiiaararpassuit arlallit nunatta kitaani kangianilu naammattuullattaalernikuugatsigit.
Takussutissiani nittartakkatsinnut ikkutatsinni takuneqarsinnaapput suluppaakkat angissusaat Nuup Kangerluani Ameralimmilu ukiut arfineq pingasut ingerlanerini qanoq allannguuteqarsimanngitsiginerat. Suluppaakkat utoqqarnik taaneqarsinnaasut 2015imi nalunaarsorneqartut 2023imi suli utoqqalineruliinnarsimapput (+8 ukiut … Eqqarsaatigalugu quianaqaaq…. kangerlummimi suluppaakkanik pisaqaraangatta utoqqalinersiutilippassuillusooq pisarisaratsigit. Suluppaagarsuit (taamak taagutillit) aamma taamatut inissisimanissaat naatsorsuutigaarput, imarpimmili kilisakkaangatta pisarisarneri qaqutigoornermut taamatut erseqqitsisigumik nalunaarsorsinnaasimanngilagut.
Suluppakkat itisoormiut ukiuni arfineq pingasuni angissutsimikkut nikissimannginnerat takussutissiami erserpoq…
Suluppaakkat ukiuni arfineq-pingasunik misissuiffigineqarnerminni Nuup Kangerluani Ameralimmilu angissusaat nikissimanngivippoq
Takussutissiami ataaniittumi takuneqarsinnaavoq ukiuni arlalinni suluppaagaaqqanik takkuttoqartanngeriarluni kiisami suluppaagaaqqanik takkussuuttoqalersimasoq peqassutsimut iluaqutaasussaamik 😊
Suluppaagaaqqat takkussuuttut suluppaakkat sorliunerannik suli takussutissaqanngikkallarpoq…
