Tarajoq-mi sulerisarpat? Saqqummersinneqarfia 30.05.2023

Puijorneqarsimassagaluarpat: Pinngortitaleriffik pilersinneqarnikuuvoq ” Kalaallit Nunaanni eqqaanilu pisuussutinik uumassusilinnik piujuartitsisumik atuinissamut ilisimatuussutsikkut tunngavissanik pissarsiniarnermik kiisalu avatangiisinik uumassusillillu amerlalluinnartuunerinik isumannaarinnittussatut”. Suliassarlu tamanna Pinngortitaleriffiup imarpikkut umiarsuartaava nutaarluinnaq annerpaarlu Tarajoq atorlugu aatsaat qalluillunilu uuttortaallunilu paasissutissanik misissuilluni ingerlatsisoqarsinnaasarpoq.

Pinngortitaleriffiup ukiumoortumik raajanik aalisakkanillu misissuinera aallarnerlugu Nuummiit Qeqertarsuup Tunua tikillugu juunip tallimaata tungaanut misissuineq siulleq ingerlanneqarpoq. Aalisakkat raajallu pisarineqartut tamarmik – pisat qannippallaarujussuanngippata – pisat tamaviisa uuttortarlugillu angissusaat allattorneqartarput. Angalaneq una siulleq piareerpat ukiunut siuliinut sanilliullugu raajaqassuseq qanoq innersoq Pinngortitaleriffiup ilisimaleriissavaa. Angalanissallu tulleriit marluk tassaasut Aasianniit Vaigat’imukariarluni Upernavimmiit Nuummukarnerit kiisalu Nuummiit Narsap tungaanut misissuinerit ingerlanneqareerpata – taava sineriammi Upernavimmiit kujataa tikillugu qanoq raajaqartiginersoq ilisimaneqalissaaq. Naalakkersuisullu 2024imi qanoq pisassiinissaannut siunnersuutit pingaaruteqarluinnartut tunniunneqarsinnaalissapput.

Angalanerup ulluini siullerni raajartarineqartartut ikittutut taaneqarsinnaapput, aammami raajaqarfissuit avataanniinnerusoq missuilluta aallartikkatta. Avannarparternerlu ilutigalugu raajaqassuseq allannguuteqarumaarpoq – sila ajorpallaassanngippat. Maannakkummi Sisimiut eqqaanni Kangerluarsuk-mi qatsorsiigatta akilinerup nalaani anorersuarnera qatsorseeriarlutigu kilisaqqilissagatta.