Tarajoq-mik angalaneq siulleq Saqqummersinneqarfia 05.07.2023

Pinngortitaleriffiup ilisimatuussutsikkut umiarsuartaava avataani misissuinerni atorneqartarpoq. Qeqertarsuup Tunuata imartaanik misissuisoq una assilisaavoq
Nunatta Kitaa, nunap assingani misissuiffissat nalunaaqutsersoqqapput
Qalorsuit umiarsuup qaavanut amuneqaqqammisut
Raajartarisat misissupallalaarneri, kingusinnerusukkut immikkoortiternissaannut karsersuarnut kuineqartinnagit
Raajartarineqarsimasut immikkoortiterneqarneri. Raajat uuttortarneqartinnagit aalisakkat qaleruallillu allat piiarneqartarput
Angalanermi aqutsisup Pinngortitaleriffimmi siunnersortaanerusoq AnnDorte Burmeisterip raajat angissusiinik uuttortaatinnani inerisimassusaat sumut killissimanersoq misissorai.
Biologinut ikiortut pisat umiarsuup qaavanut qaqinneqarnissaat utaqqigaat
Tarajoq saavanilu sikut.
Raajat immikkoortiterneqartut.
Tarajoq sikorsuit akornganni ingerlaarusaartoq
Tarajoq-mi naalagaq aquttorlu ukiorparujussuarni umiartornermik sikorsuaqartumilu angalanermik misilittagaqarluartut
Saarulliit (Gadus morhua) paasissutissartaat allattorneqartut
Ussuk sikorsuarni eqqissisimaartoq
Aaveq sikorsuarni eqqissisimaartoq
Saarullinnik, suluppaakkanik, qaleralinnik qeeqqanillu uuttortaallunilu misissuillattaaneq
Allattoq Julius Nielsen

Pinngortitaleriffiup ukiumoortumik avataani misissuinera ingerlanneqaleruttorpoq. Maajip qaammataata naalerneraniit juunip naalernerata tungaanut Tarajoq kitaata sineriaata raajaqarfia ingerlaarfigalugu Nuup nalaaniit Upernavik tikillugu raaja itisoormiioq (Pandalus borealis) aalisakkallumi allat misissuiffigineqarput. Natsorsuineq atorlugu sumiiffinni toqqakkani aalajangersimasuni itissutsinilu 50-600 meterit akornganniittuni kilisattoqartarpoq. Kilisaffissat inissisimaffiisa assigiinngitsuniinnerisa qulakkeertarpaat itissutsini assigiinngitsuni aqutsivinnilumi assigiinngitsuni misissuilluni kilisattoqarnissaa. Periaasermi taanna atorlugu nunatta kitaani raajaqassutsip inissisimaffia pitsaanerpaamik paasisaqarfigineqartarpoq, taamatuttaaq qanoq saarulleqartiginera, suluppaagaqartiginera qaleraleqassusialu angalanermi paasisaqarfigineqartartoq.  Angalanermi kitaata sikuanik maajimi juunimilu sikoqarsinnaanera tupaallannartuunngilaq, ukioq mannali pisarnermit sikoqarnerujussuusoq takuneqarsinnaavoq. Sikut avaqqunniarsarisarpagut ingerlaarfigalugit piffissamik atuinarpallaartarmata, allatulli periarfissaqanngikkutta Tarajoq-p ajornaquteqanngitsumik sikut illuartiterluaannarsinnaalluarpai. Sikuli issuallaarlunilu eqitersimavallaaraangat tamaani ningitsinissaq taamaatiinnartariaqartarparput. Nunatta kitaa ukioq manna sikorsuaqangaarmat pisarnitsinnit annertunerujussuarmik sikorsuit akornganniippugut ussuit, arrit nannullu naammattoortarlutigit.

Tarajoq’p ukioq manna angalanerani siullermi nunatta kitaa suli assut ukiuusoq malunnaqaaq, taamaakkaluartorli 2023ili aallaavigalugu raajartassiissutissanik siunnersuinissatsinnut naammattunik tutsuviginartumillu paasisaqarluarnissarput neriuutigaarput. Angalanermi ukioq manna ingerlanneqartumi siullermi DNA’mik misissugassat 700it tiguneqarput, aalisakkallu 1200it siunnaavinik tigusilluta, raajallu itisoormiut 13000it angissusaat uuttortarlutigit.