Nalliuttorsiuutaa inuulluaqqusineq Saqqummersinneqarfia 26.01.2024

Emma Kristensen Klaus Nygaardilu ukiorpassuarni suleqatigiissimapput
Pinngortitaleriffiup pisortaa Josephine Nymand suliffeqarfik sinnerlugu oqalugiarpoq
Attaveqatigiinnermut pisortaq Else Løvstrøm Emmamut qujassuteqarluni oqalugiarpoq
Emma Kristensen ukiorpassuarni Pinngortitaleriffimmi paasissutissiinermut pisortatut atorfeqariarluni ukiuni kingullerni tallimani siunnersortaanertut atorfeqarsimavoq.
Emma Kristensen atorfeqarsimanerminut uppernarsaammik naasunillu tunineqartoq
Emma Kristensen marloriarluni Pinngortitaleriffimmi atorfeqarsimavoq katillugulu ukiuni 17ini qaammatinilu arfinilinni atorfeqarsimalluni
Sulisut arlallit ataatsimiigiarlutik angalagaluartut sulisut sinneri malunnartitsinermut peqataalluarput
Inuk, uumasorsiuutut ilinniarsimasoq Emma'p erneranik meeraqateqarlunilu peroriartoqateqarsimavoq

Emma Kristensen pisortani atorfeqarnermini ukiuni 17ini qaammatinilu arfinilinni  Pinngortitaleriffimmi atorfeqarsimasoq pingasunngormat ukiuni 25ini pisortani atorfeqarsimasutut nalliuttorsiutigineqaatigaluni inuulluaqquneqarpoq.

Emma Kristensen tusagassiortutut ilinniarsimasuuvoq, ukiorpassuarnilu 2018ip qiteqqutereernera tikillugu Pinngortitaleriffimmi Paasissutissiinermut pisortatut atorfeqarsimavoq. 2018imiillu maannamut siunnersortaanertut atorfeqarsimalluni.

-Paasinartumik avammut nalunaaruteqartarnissarput sukataarutigisarsimaqaat, kalaallillu oqaasiisa eqqortumik torersumillu atorneqartarnissaat ilungersuutigisarsimaqalugu, Pinngortitaleriffiup pisortaa Josephine Nymand ilaatigut oqalugiarnermini oqarpoq.

Josephine Nymandillu Emma peqatigalugu Lene Kielsen Holmilu pingajoralugu nunanut allanut angalaqatigiittarsimanitik puijunaatsut eqqartorpai.

Emma’p ukiuni Pinngortitaleriffimmi sulinermini oqaatsit ilisimatusarnerup silarsuaani atorneqartartut kalaallisuunngortinneri katersorsimavai. Allattugaalumi taakkua saqqummersinneqartinnagit angutinut oqallorilluinnartunut nalilersortinneqarlutillu tulluarsaqqinneqarsimapput.

-Niels Henrik Lynge, Nikolaj Heinrich aammalu Nikkulaat Jeremiassen peqatigalugit allattugarisimasatit eqqartortaratsigit ulloq sekundtitut sivikitsigisarporlusooq oqallittarnigut nuannertangaarmata, Else Løvstrøm ukiuni kingullerni tallimani Emma’p ningiorisimasaa nassuiaavoq.

Qujaffigalugulu oqaatsit atorneqarluartartut katersorsimammagit, taamaasilluni ullumikkut sulisut sulisitallu avataaneersut allattukkat atorluartarmatigit.

Emma Kristensenip oqaluttuaraa angalanini siulleq Qaanaamukarnerusimasoq kingornalu Qeqertarsuarmi unnuakkut marluk tungaanut ataatsimiisitsisimanitik puijunaatsuunerarlugit.

-Pinngortitaleriffimmi suleqatigiissimanitsinnut qujanarujussuaq, tamaani angalaartunga aliortugarissagaluarussinga aneqquunnartarumaarpassinga, Emma Kristensen quuasaarluni oqarpoq.