Immami uumasut ataqatigiinnerat pillugu Ph.d.-nngortoq Saqqummersinneqarfia 17.11.2011
Silap Pissusianik Ilisimatusarfimmi ilisimatusartup, Kristine Engel Arendtip, ullumi Issittumi immami pinngortitami ataqatigiinneq pillugu Ph.d-nngorniutini illersorpaa. Ph.d-nngorniummi Nuup Kangerluata aamma kangerluit Kitaatalu imartaata assigiinngissutaat qitiutinneqarpoq.
Kristine Arendt 2005-imi Silap Pissusianik Ilisimatusarfimmi ilisimatusartutut aallartippoq aammalu professor Søren Rysgaard peqatigalugu nakkutilliinissamik pilersaarusiaq MarinBasis piorsaaqataaffigisimallugu. Pilersaarusiami Nuup Kangerluani Issittup kiannerumaartortaani pinngortitami ataqatigiinnermi paasissutissat silamut aamma immami uumasoqassutsimut tunngasut nakkutigineqarput katersorneqartarlutillu. Pilersaarusiami maanna tikillugu ukiuni arfinilinni paasissutissanik katersuisoqarsimavoq aamma Nuup Kangerlua nunarsuarmi kangerlunni misissuiffigineqarnerpaanngulerpoq. Silap allanngoriartornerata kingunerisaanik aamma Sermersuup pingaarutaanik ilisimasaqartariaqarneq eqqarsaatigalugu paasissutissanik katersuineq pingaaruteqarpoq naliitsuullunilu. Paasissutissat tamakku Ph. d-nngorniummut maannakkut saqqummiunneqartumut ilanngunneqarput.
Kristine Arendtip Ph.d-nngorniutaata ilaatigut takutippaa kangerlunni nerisareqatigiit Kitaata imartaanit allaanerujussuusut, tassami kangerlunni plantoneqatigiit aamma immami ammaannartumi plantoneqatigiit assigiinngitsorujussuummata. Uumasuaqqat mikisut, illeqqat, ingammik mikisunnguit tamakku, Microsetella norvigica, immami ammaannartumi illeqqanut sanilliullugit tupaallannartumik amerlanerujussuupput. Immami ammaannartumi illeqqat angisuut, Calanus, uumasoqatigiinni amerlanersaapput nerisarineqarnerpaallutillu, ilaatigut saarullinnit tukerlaanit arfivinnillu. Kristine isumaqarpoq Sermersuup kangerlunnut sunniutai pingaaruteqarnerpaasut, taamaattumik kangerlunni pinngortitami ataqatigiinneq immami ammaannartumit allaanerusoq. Sermersuup kangerlunni imaq imermik aamma kinnernik ujaranngornikunik pilersorpaa tamakkulu plantonit inissitsiternerisa assigiinngissutaannut sunniuteqarsinnaapput.
Doktorinngorniut Silap Pissusianik Ilisimatusarfimmi, Pinngortitaleriffimmi aamma Københavns Universitetimi ilisimatusartut suleqatigiinnerasut suliarineqarpoq. Pilersaarusiaq aningaasatigut Kommissionen for Videnskabelige Undersøgelser i Grønlandimit tapiiffigineqarpoq.
Ph.d.- thesis:
