Silap Pissusianik Ilisimatusarfimmi ilisimatusartut umiarsuanik angalasut Saqqummersinneqarfia 13.10.2011

Silap pissusianik Ilisimatusarfimmi ilisimatusartut Issittup imartaanut maannakkorpiaq angalanernut marluinnut peqataapput.

Malene Simon amerikamiut ilisimatusartut umiarsuaannut R/V Knorr-imut ilaalluni Qeqertarsuup Tunuata kitaani naalaarutinik puttaqusikkanik ikkussuivoq. Sikup siammarsimanera eqqarsaatigalugu arferit ingerlaartarnerisa paasisaqarfigineqarnerunissaannut naalaarutit puttaqutiniittut iluaqutaassapput.  Pilersaarusiap taassuma ilaani Craig Lee, APL, Washington University, aamma Malene Simon, Silap Pissusianik Ilisimatusarfik, suleqatigiipput.

Tamanna ilutigalugu Søren Rygaard aamma Thomas Krogh Canadamiut sikunik aserorterutaataanni Sullualumiittumi Amundsenimiipput. Tassani Silap Pissusianik Ilisimatusarfimmi ilisimatusartut immap naqqani uumasuaqqat, sarfap pissusia sikusarneralu sukumiinerusumik misissussavaat.

Amundsenimik angalaneq Kalaallit Nunaata Canadallu akornanni imartanut ilisimasassarsiornerit arlallit siullersaraat tassaallunilu Pinngortitaleriffimmi Silap Pissusianik Ilisimatusarfimmi aamma Manitobami Universitetimi ilisimatusartut akornanni suleqatigiinnissamik isumaqatigiissutip kingunerisaanik toqqaannartumik angusaq. Ilisimatusartut qanimut suleqatigiinnissaasa saniatigut Issittumi ilinniartitsineq aamma avatangiisinik misissuineq pillugu suleqatigiinnerup piorsaaffigineqarnissaa siunertat ilagaat.

Foto: Thomas Krogh