Aalisagaqatigiiaanut immap ikerinnaasiortunut pisassiissutigineqarsinnaasutut innersuussutit qaffariaateqarput Saqqummersinneqarfia 05.10.2016
Allattoq: PeMi
Biologit Atlantikup avannaata kangiani avaleraasartoortassiissutigineqarsinnaasut, ammassassuartassiissutigineqarsinnaasut saarullernartassiissutigineqarsinnaasullu pillugit ukiormannamut siunnersuinerat siorna pisassiissutigineqarsinnaasutut innersuussutaannit qaffariaateqarput.
ICES´imit 2017-imut avaleraasartoortassiissutigineqarsinnaasututinnersuussutigineqarput 944.302 tonsit sippornagit pisassiissutigineqarsinnaanerat, tassa ukiormanna 2016-imi innersuussutigineqartunit 773.842 tonsiusunit qaffariaateqartitsisoqarluni.
Nunat assigiinngitsut 20-nit amerlanerusut avaleraasartoorniaqataasarput, 2015-imilu pisat tamakkerlutik 1,2 millioni tonsiusimapput. Nunatsinniit aalisariutit avaleraasartoorniarnermi 2011-miit peqataasalerput.
ICES´imit 2017-imut ammassassuartassiissutigineqarsinnaasututinnersuussutigineqarput 944.302 tonsit sinnernagit pisassiisoqarsinnaasoq, tassa 2016-imut innersuussutigineqartunit 316.876 tonsiusunit qaffariaateqartitsisoqarluni.
Nunat assigiinngitsut 11-nit amerlanerusut ammassassuarniaqataasarput, 2015-imilu tamakkerlutik pisarisimasaat 328.740 tonsiusimapput. Aalisariutit Nunatsinneersut ammassassuarnermi 2007-imiit peqataasalerput. Nunatsinneersunit 2016-imi 17.000 tonsit missaaniittut ammassassuartarineqarnissaat naatsorsuutigineqarpoq.
ICES´imit 2017-imut saarullernartassiissutigineqarsinnaasututinnersuussutigineqarput 1.342.330 tonsit sinnernagit pisassiisoqarsinnaasoq, tassa 2016-imut innersuussutigineqartunit 776.391 tonsinit qaffariaateqartitsisoqarluni.
Nunat assigiinngitsut 20-nit amerlanerusut saarullernarniaqataasarput, 2015-imilu tamakkerlutik pisarisimasaat 1,4 millioni tonsiusimapput. Aalisariutit Kalaallit Nunaanneersut 2013-imiinnaq saarullernarniarnermi peqataasimapput, taamanikkut 2.133 tonsit tulaanneqarsimallutik. Aalisariutit Nunatsinneersut nunat tamat imartaanni aammalu Savalimmiut imartaanni saarullernarniaqataasartut nunat sineriallit isumaqatigiissutaat naapertorlugu aalisaqataasarput. Saarullernartassiissutaasut ilaminiinnanngui (2%-inik ikinnerusut) Kalaallit Nunaata imartaani aalisarneqartarput.
Irmingerip Imartaani suluppaakkanik ikerinnaasiortunik aalisartarneq nalinginaasumik suluppaagaqatigiinnut ikkannerusumiittartut aammalu itinerusumiittartunut sammitinneqarneraaq. Tappavani suluppaagartarineqartartut 1990-ikkut qiteqqunneranniit 240.000 tonsit pallimaleraluarpaat, peqassutsilli pisassiissutaasartullu appariaateqarnerat ilutigalugu 30.000 tonsinut appariarnikuulluni.
Irmingerip Imartaani suluppaagaqassutsinut tunngatillugu biologit 2017-imut aamma 2018-imut siunnersuineranni toqqaannartumik aalisartoqannginnissaa innersuussutigineqarpoq. Suluppaagaq arriitsunnguaannarmik alliartortartuuvoq, taamaammaallu peqassutsip ukiuni aggersuni pitsanngoriaateqangaarnissaa naatsorsuutigineqanngilaq.
Siunnersuineq uani aaguk.
Itinerusumik paasisaqarusunnermi saaffigisassaq:
Aalisakkanut Qalerualinnullu Immikkoortortaqarfimmi pisortaq, Helle Siegstad, oqarasuaat 361200 imal. email hesi@natur.gl