*Required
*Required
*Required
*Required
*Required
*Required
*Required
*Required
Send
Thank you for your application!
 

Immami kissartumi manniit

Eqalugaq (Boreogadus saida) imaani uumasoqatigiiaat ataqatigiiaarneranni pingaaruteqarnerpaat ilagaat. Aalisakkat, timmissat imaaniittartut, puisit, miluumasullu nerisaasa pingaarnersarigamikkit, taamaattumillu Nunatsinni kulturikkut kinaassuttitsinnut, nerisassaqarniarnikkut, inuiattullu aningaasarsiornikkut eqalugaq pingaaruteqarluinnartuuvoq. Silalli allanngoriartornerata kingunerisaanik nunatsinni sumiiffiit ilaanni eqalugaqarniarneq erloqinartorsiortitaavoq. Tassami Qeqertarsuup Tunuani Uummannallu Sulluani ukiuni kingulliunerusuni arlalippassuariarluni immap qaavatungaa ima kissartartigisimavoq, allaat eqalukkat mannii aammalu tukeersimasuugaluit eqalugaaraaqqat toqoraannarsimasut amerlasuupilussuit naammattuugassaasalersimallutik. Tamanna ilisimatuussutsikkut saqqummiisarfimmi atuagassiami Arctic Science-mi ulluni makkunani atuarneqarsinnaavoq. Tassami Pinngortitaleriffimmi ilisimatusartartoq Caroline Bouchard suleqatigisartakkani nunani allaneersut peqatigalugit ilisimatuussutsikkut allaaserisamik saqqummersitseqqammerput.

Manniisa eqalugaaraaraaqqallu immap qaavatungaata 3°C-init kissarnerulernerani tukerneq ajuleriartuaalertarput. Imaq 3°C-iniit kissarneruleraangat, uumaniarsinnaanerminnut killissaat tikinneqartarami manniimi ikittuinnannguit taamaallaat tukersinnaasaramik. Immap kissassuseq 5°C-it angugaangagu mannik tukeraangami eqalugassamaat quperlutut angitigisunnguusarpoq perlimoortuaannarninilu peqqutigalugit toqunngujoortuinnaasarluni. Kissassutsimut naammagittarsinnaassuseqarnerat sukorsinngulernerisalusooq nalaanni 11°C-t tikillugit uumasinnaassuseqartarpoq, taama nassuiaavoq ilisimatusartartoq Caroline Bouchard, Pinngortitaleriffik.

Qeqertarsuup Tunuani Uummannallu sulluani Immap qaavata juuli qaammat agguaqatigiissillugu 5°C-iniit kissarnerusalernera 1990-ikkoqarneraniit akulikinnerujartortoq takuneqarsinnaavoq. Eqalukkat pinngornerminniit qajannarnerpaaffigisaat piffissaq tassaavoq pinngoqqaarnerat, manniinerat aammalu mikisuaraanerat.
”Kiatsikkaluttuinnaannassappat sumiiffinni taakkunani eqalukkanut ajorluinnartumik kinguneqassaaq. Tassami eqalukkiat imaq kissarpallaaq najorsinnaanngilaat.
Taamaattumik ilisimatusartartut naatsorsuutigaat sumiiffinni matumani pineqartuni eqalugaqassuseq apparumaartoq. Taamaattoqassappallu uumassusillit ataqatigiiffiinut assigiinngitsorpassuarnut malunniuteqangaassaaq, eqalugarmi issittup imartaani uummassusillit ataqatigiiffiinut tamanut pingaaruteqarnerpaat ilaattut inississimammat.

Silap pissusiata allanngornera sumiiffinni allani allatut sunniuttarpoq, taamaalilluni siuliani eqqartorneqartut tassa eqalugaqassuseq imartat ilaanni appariaateqassagaluarpat kingunissaasinnaasut pitsaavallaanngitsut immaqa sumiiffinni allani allaanerunerat peqqutaalluni taama malunnaateqartigisumik sunniuteqanngeratarsinnaapput.

”Assersuutigalugu Ukkusissat kangerluanni eqalugaaraararpassuarnik katersisoqarsimavoq, naak immap qaavatungaa kissangaatsiartorsuugaluartoq (10 °C). Tamaanimi imaq sermersuup aanneranit allatut sunnigaavoq taamaasilluni eqalugaaraaqqat angissusertik oqimaassusertillu pissutigalugu immap qaaniit kiveqqanerullutik inissisimasarnertik iluaqutigisarpaat, tassami sumiiffigisartagaat immap qaavatungaanut sanilliullugu nillernipilussuummat. Maannali Kalaallit Nunaata sermersua ilimagisamit sukkanipilussuarmik aakkiartupiloormat imaassinnaavoq kangerlunni eqalugaqassutsit ikiliartulerfissaraluinik kigaallassimaartitsisinnaassasoq”, Caroline Buochard naggasiivoq.

Allaaserisaq tamakkerlugu atuarneqarsinnaavoq uani.

 

Sukumiinerusumik paasisaqarniaraanni saaffigisassaq:

Ilisimatusartartoq Caroline Bouchard Silap Pissusianik Ilisimatusarfik oqarasuaat 361200 imaluunniit mail: cabo@natur.gl

Eqalugaaraq mannimmiit tukertoq..