Kalaallit Nunaanni nipisaqarnera ilorraap tungaanut ingerlavoq Saqqummersinneqarfia 22.09.2021
Pinngortitaleriffiup nipisanniarnerup nunattalu kitaani peqassuseq nalilersuiffigeqqammerpaa. Nipisaqarnera ajunngilluinnartumik inissisimavoq, arnarlunniartoqarneralu piujuartitsiniartumik ingerlanneqartutut nalilerneqarpoq.
Pinngortitaleriffiup siunnersuutigaa 2022-mi pisat annertussusaat katillugit (TAC) 20 %-inik qaffanneqarsinnaasut, taamaalilluni nipisat suaanik tunisassat 1.475,3 tonsinut qaffanneqarlutik. Kalaallit Nunaata kitaani nipisanniarnerup aqutsivigineqarnerata taamatut siunnersuinermi malinneqarpoq.
Kalaallit Nunaanni nipisaqassutsip naatsorsornissaanut periutsimik naleqquttumik peqanngikkallarpoq. Taamaammat tunisassiani tulaassani ukiut ingerlanerini nipisaqatigiiaat amerliartornerannik ikiliartornerannilluunniit takussutissaasinnaasut assigiinngitsut nalilersuiniarnermut paasissutissatut atorneqartarput.
Nipisaqarnera ilorraap tungaanut ingerlaarpasippoq, amerliartortoqartorlu takuneqarsinnaavoq, 2010miit ullumimut nalunaarsorneqarsimasut kisitsisit takutippaat 2021-mi aatsaat taamak amerlatigisunik nipisaqartoq.
Sineriak tamakkerlugu nipisat suaasa tunisaaneranni aalisakkanut tulaavinniit paasissutissat katersorneqartuaannartut misissoqqissaareerlugit nalilersuinermi inernerniliinermut tunngavigineqarput. Arnarlunniartut ukiuni kingullerni qassutini ataatsini pisarisartagaat amerligaluttuinnaramik. Ingammik 2021-imi, arnarlunniarneq ingerlalluarsimavoq pisassallu amerlanersaat siusissukkut pisarineqarsimallutik.
Nalilersuineq pillugu uani itinerusumik paasisaqartoqarsinnaavoq: Kalaallit Nunaata kitaata imartaani nipisannik arnarlunniartarnerit aqutsinikkut naliliiffigineqarnera 2010-2021
Itinerusumik paasisaqarniaraanni attavissaq:
Aalisakkanut Qalerualinnullu immikkoortortaqarfimmi Ilisimatusartartoq Søren Post oqarasuaat +299 36 12 00 mail: sopo@natur.gl
