Saarulliit

Sumiiffik paasisaqarfiginerorusutat iserfiginiarlugu toqqagassat qulaaniittut arlaat tooruk.

Aalisakkanut siunnersuinermut atuuttumut eqikkaanerit tamakkeqqasut uani aaneqarsinnaapput: Aalisakkat assigiinngitsut pillugit 2025-mut ICES-imit siunnersuinerit eqikkarnerat

Nunatta imartaani saarulleqatigiiaat assigiinngitsut sumiiffinni assigiinngitsuni suffisartut aalisarneqartarput. Sumiiffiillu sisamat aallaavigalugit siunnersuisoqartarluni. Saarulleqatigiit assigiinngitsuninngaaneersuunerat tulluarsaaffiginagit siornatigut siunnersuisoqartaraluarpoq.

Takussutissiaq 1 Saarulleqatigiiaat assigiinngitsut pingasut qanoq akuliussuuttarnerisa agguataarneqarnerat: Kitaata avataani suffisartut (WOSC) qorsuk, Kitaani sinerissap qanittuani suffisartut (WISC) kajortut aammalu Tunup Islandip avataanilu suffisartut (EGIOSC) sungaartut. Sumiiffigisartagaat ammalortulersugaapput.

Pinngortitaleriffik ukiuni arlalinngortuni Atlantikup avannaani ICES-imilu suleqatigisartakkat peqatigalugit saarulliit pillugit siunnersuisarnermik pitsanngorsaaqataasimavoq. Kingullertigut saarulliit kingornussartassartai suminngaaneernerannillu paasissutissat ilanngullugit misissuiffigineqartalernikuupput. ICES-ip immikkut ilisimasallit avataaneersut peqatigalugit nalilersueqataallunilu saarulliit Kalaallit Nunaata eqqaaneersut pillugit sulianik akuersissuteqareerpoq ataatsimiinnermi ’benchmark’-imik taaneqartartumi.

Saarulliit Kalaallit Nunaata Kitaani suffisartut (sinerissap qanittuani avataanilu): Kisitsisitigut paasissutissat pitsanngornerusimapput aamma kingornukkattamikkut paasissutissartaat sumiiffinnilu assigiinngitsuneersuuneri nunap immikkoortuani sumiinneq aallaavigalugu ilanngunneqartalersimapput. Kalaallit Nunaata Kitaani pisassiissutissatut siunnersuineq taamaattumik qajannaatsumik inissisimaannarani assersuussiffissaqartuaannarpoq. ICES-imi siunnersuineq 2025-mut tunngasoq:

1. Saarulliit Kalaallit Nunaata Kitaani suffisartut: Pisat 4.455 tonsinut killilerneqassasut ICES-ip innersuussutigaa: Taakkunannga 2.151 tonsit Nuup avannaani pisarineqarsinnaassasut, kiisalu Nuumminngaanniit kujammut 2.304 tonsit pisarineqarsinnaassasut.
2. Saarulliit Kalaallit Nunaata Kitaata avataani suffisartut: Pisat 3.238 tonsinut killilerneqarput (Kalaallit Nunaata Kitaanut tamanut atuuppoq; avataanut aamma sinerissap qanittuanut)

Saarulliit Tunumi-Islandimilu suffisartut (aamma Tunumi Kitaanilu pisarineqartartut): Tunumi saarulliit tassaanerupput Tunumi/Islandimi pinngortut (takuuk Takussutissiaq 1). Saarulliit Kleine Bankemi Islandimilu suffisartut sananeqaataat assigiipput, aamma Islandip Dohrn Bankellu akornanni ingerlaartarnerat naammattumik suli ilisimasaqarfigineqanngilaq. Taamaattumik peqassutsip killiffia aallaavigalugu pisarineqartarnerinut assersuunneqarnissaannullu ICES-iminngaanniit naliliisoqarsinnaanngikkallarpoq, peqassutsimullu tunngatillugu kisitsisitigut paasissutissat `amigartut` pigineqarneri aallaavigalugit siunnersuisoqarpoq (tassa 2022-mi pisarineqarsimasunit innersuussutit 20%-imik ikilisinneqarput). ICES-ip 2025-mut innersuussutai:

3. Saarulliit Kalaallit Nunaata-Islandillu avataanni suffisartut: ICES-ip innersuussutigaa Kalaallit Nunaat tamakkerlugu taakkunannga 23.518 tonsit pisassiissutigineqassasut (Kalaallit Nunaata Kitaani aamma Tunumi).

ICES-imit innersuussutigineqarpoq pisortani ingerlatsisut pisassiissagaangamik suffisartunit akusat siunissami eqqumaffigineqartassasut. Pisassiissutaasartussat sumiiffinni TAC-t aallaavigalugit aalajangiiffigineqartarsinnaassapput, aammali sumiiffinni assigiinngitsuni suffisartuni aalisartoqartarnera eqqumaffigineqartariaqarsoraat. Assersuutigalugu Maniitsup eqqaani aalisartut saarullinnik avannaani sinerissap qanittuaneersunik suffisartunik kiisalu avataaneersunik assigiinngitsut marlunneersunik suffisartunik pisaqartarnerat eqqumaffigineqassaaq (takussutissiaq 1). Pisassiisarnerni saarulliit suffisarfinni assigiinngitsuneersuusut sippuiffiginaveersaartarnissaat eqqarsaatigineqartariaqartassaaq.

Siornatigut siunnersuinerit uani atuarneqarsinnaapput: